فاض بينه الشوق و إحنه إنطوفك جينه يمك يالجواد إضيوفك

فاض بينه الشوق و المدمع يسيل و إحنه زوارك يبن حامي الدخيل

ندري بترابك دوه إيشافي العليل ابكل قلب طاهر كتبنه إحروفك

جنه نحلم من بعد غربه نجيك سيدي و مثل القطه إنحومي عليك

من رجعنه إشلون جيه جينه ليك و بعد أحباب و إجينه إنشوفك

جنه نقره إزيارتك بس بالكتاب و جرعتنه الغربه كاسات العذاب

و إندعينه و ربنه للحق فتح باب و بعد سابع مستحيل إنعوفك

ما نزل عن دربك إشما حاربوك و إحنه نبقه أتباعك و شيعة أبوك

تعبتهم سيدي و ما تعبوك وبشرف عشنه العمر بطيوفك

إشما قست ويانه مولاي الظروف ابقبر موسى الكاظم و قبرك نطوف

و حق صبرك ما يمر بالشيعه خوف و إحنه ما ننسه فضل معروفك

إحنه عاهدناك عهد الأوفياء نرخص الأرواح و إنضحي الدماء

علمتنه اعله المواقف كربلاء و إرتوينه الغيره من إجفوفك

إتحزمينا ابغيرتك يبن البتول و نبقى طول الدهر شيعتكم نقول

لا و حق صدر التهشم بالخيول إنصيح جرح الدنيا يمتى إنروفك