زينب آنه و لجلك نوحي هاي الليله

جيتك أخف الجذم ...صبري اعليك إنهدم ...هاي الليله

يبويه يا من اتربيت ابحجرك آنه من زغري

مكسورة قلب جيتك أظن ما ينجبر كسري

حين إسمعت بصوابك صفه دمعي دمه يجري

إندهل عقلي يبويه ابحين شفتك و إنشده فكري

مثل إدموعك أذرف دمعي لجل امصابك

يا حيدر و إتغير وضعي لجل امصابك

بويه و أقسم قسم...صبري اعليك إنهدم ...هاي الليله

يبويه ما حسبت إحساب أشوفك يا علي مجروح

على إفراش المنيه اتلوع يبويه و من ايديه اتروح

أنا زينب تخليني للهم و السهر و النوح

لون بيدي جنت أفديك و دونك بويه أفدي الروح

ماريد إوداعك يالوالي لتودعني

أفديك ابروحي و كل غالي لتودعني

ابوجهك حزني إنرسم...صبري اعليك إنهدم ...هاي الليله

يبويه ما أظن دهري عقب عيناك يرحمني

يبويه باجر ابغيرك بخوتي إردود يفجعني

شسوي لو رحت عني يبويه أرجوك كلمني

تمنيت الأجل وياك لمي الزهره ياخذني

بين إهمومي و بين آلالامي لتضيعني

و بحزني و بغربة أيامي لتضيعني

شوفي مني إنعدم...صبري اعليك إنهدم ...هاي الليله

يحماي الحميه اليوم أشوفك منخطف لونك

على إعيالك و أهل بيتك تدير الليله بعيونك

تودعهم يحامي الجار و أشوفنهم يودعونك

و أسمعنك توصيهم و أهل بيتك يسمعونك

يالرسمك ساكن بعيوني لتخليني

بين أشواقي و بين إضنوني لتخليني

ابلوعه أصيح و ألم...صبري اعليك إنهدم ...هاي الليله

بس هالليله يا بو حسين إنت يا علي يمي

من أشوفك أنسه آلالامي و حزني و لوعتي و همي

و باجر بالطفوف أفقد إخوتي و كل ولد عمي

أظل ابكربله وحدي و أشوف النار بخيمي

يوم الطف وحدي ايخلوني كل أحبابي

ابخذر و أطفال يكلفوني كل أحبابي

من أطفي لهيب الخيم ...صبري اعليك إنهدم ...هاي الليله

يبويه لو رحت عني و أمي الزهره تنظرها

وصيه هاي من عندي أريد هناك تذكرها

تسلم لي عليها اهواي و عن حالي تخبرها

تقلها زينب إخلافج بقت مكسور خاطرها

يا حيدر خبر الزهره من إتقابلها

تنطيها عن حالي الفكره من إتقابلها

الحزني ايرفرف علم...صبري اعليك إنهدم ...هاي الليله