بين الحسن و احسين ... هاي المسيه

بمصاب أبو الحسنين ... صارت دموع العين

صارت دموع العين ... تهمل جريه

بالحسره و الأقدار ... طاح الوصي الكرار

طاح الوصي الكرار ... هاي المسيه

بدار الوصي ليل الهضم بعتمه انبنت أستاره

و نجم السمه ببرج الحزن غاب و طفت أنواره

حيدر علي الليله اعتلت صرخة حزن من داره

و الكون ايضج بنايحه و أصبح يبث أكداره

أبو الحمله علي اتصوب بدت عالدنيه آثاره

تمثلت بالحسن و احسين مصيبه بدمعه محتاره

متحيره الدمعات ... و الونه و الآهات

و الونه و الآهات ... يا حاله أصعب

لن هاتف الحسرات ... ناده بونين الذات

ناده بونين الذات ... حيدر تصوب

صاح بهضم محتار ... طاح الوصي الكرار

صوت البواجي بالسمه يبدي الهضم و الحسره

و يرسل مراسيل الحزن بالنايحه للعتره

أول رساله للحسن أرسلها رب القدره

من شاهد انجوم السمه بطرت الفجر منكدره

يصد وجه السمه اتغير يحسها تهمل العبره

يالن صوت الوحي ناده وقع حيدر من الطبره

صوت الوحي المبحوح ... ناده بلسان الروح

ناده بلسان الروح ... الله أكبر

و المجتبه بالنوح ... تايه لاوين يروح

تايه لاوين يروح ... بالهم تحير

من وصلته الأخبار ... طاح الوصي الكرار

شبل الوصي من هالخبر فكره انشده و اتحير

و بجفنه مخنوق الدمع و اعله البجي ما يقدر

شد عالحزن حيله و إجه لحسين ايون يتحسر

من شاهده احسين اندهل من حالته و اتكدر

وكت ما شاف اخوه يبجي يظنه الأمه يتذكر

لجن المجتبه ناده يخويه صوبوا حيدر

احسين بقلب مالوم ... ظل ينتحب مهموم

ظل ينتحب مهموم ... تتجاره عينه

و العبرة المهضوم ... فجر مسيل اهموم

فجر مسيل اهموم ... نوحه وونينه

يجري الدمع مدرار ... طاح الوصي الكرار

للمسجد اتعنه الحسن و احسين يون بمصابه

و من دخلو المسجد يالن طاح الحسن عد بابه

بعينه يصد المرتضه واقع وسط محرابه

اتعنه الحسن يزحف لعد حيدر علي و اصوابه

يالن احسين إجه بنوحه لبوه وروحه مرتابه

يعاين دمه يتنثر و يلون شيبه بخضابه

احسين بدمع سجاب ... صد عينه للمحراب

صد عينه للمحراب ... يشجي المصيبه

شاف الوصي منصاب ... ناده يا داحي الباب

ناده يا داحي الباب ... و الله عجيبه

اشلون بحمه الجبار ... طاح الوصي الكرار

حالت حزن ما تنوصف منها القلب يتعجب

قالع حصن خيبر وسف دمه يصب عالمنكب

واتسنده أولاده وهو ليث الحرب لمجرب

هذا ابو الحمله علي المنه الزلم تتهيب

عظيمه الحاله و الأعظم علي بداره لونه طب

مسيل ادمومه و اخضابه تشوفه بهالوضع زينب

ما تقدر بهالحال ... تنظر علي ينشال

تنظر علي ينشال ... اشيحمل صبرها

منظر يهد اجبال ... ما جان أبد عالبال

ما جان أبد عالبال ... منظر يمرها

و لو تسمع اللي صار ... طاح الوصي الكرار