و اللي صاب الجود صوب عيني لو نمت كتر النهر عذريني

يختي عفتج غصب عني ابكربله و آنه بيج اكفلت وي العايله

ما نسيتج إي و حق عقد الوله لجن طاح ايساري فوق ايميني

عاهدت أرعاج يختي اوي العمر و آنه ليج الجنت يا زينب ذخر

ما يمسج عهدي بالدنيه العسر اشلون بيه و ما وفيت ابديني

يبقه ليج الدين دوم اوي الدهر حقج اتلوميني بن فارس مضر

اعليج ظل قلبي و أنا ابكتر النهر امقطع ابسيف العده تدريني

و آنه الموزم يزينب بالحرم أحمي ليها و ليها أبذل للهمم

اشلون تالي طاح و ابعيني السهم و صارت اعيال النبي اتناديني

حقها لو بيَ تلوم اسكينه اتصيح عمي اوياي وعدك وينه

يمته ترجع للخيم تروينه شرد قلها شعتذر فهميني

صوب نهر العلقمي من ارحلت أروي ليها ابجفي ماني الواعدت

لجل وعدي بالعده أبداً ما همت صرت و اجيوش العده امحوطيني

صرت من اعداي ما تقبل عدد وحق عينج ما همت بيهم أبد

استحليت القنطره شبل الأسد اعليها يختي ريتج اتشوفيني

عالبطوله ابيوتنه متعوده زين و اتعرفين ما هاب العده

مني و اعداي الغدت متشرده و اغرفت هالماي و بجفيني

آه يزينب و العطش قص الدليل يحرم الماي اعله بن حامي الدخيل

غدت فوق الماي دمعاتي تسيل عفت نيران العطش تسبيني