اعليمن هالجيش الجرار....عالأكبر لو عالمختار

من راد الأكبر يطب سوح الحرايب

لن ابو اليمه هتف من قلب ذايب

ناده اعله جيش العده اوياكم أخاطب

اعليمن إجت حاشده اجيوش و كتايب

حسين يشاهد هالمنظر....وجه انخطف و اتغير

مره ايودع الأكبر....مره ايخاطب العسكر

يصرخ يا من خنتوا ابعهدي.... خنتوا ابعهدي

اعليمن سليتوا الأشفار....عالأكبر لو عالمختار

سبط النبي اويه الدمه صوته ايتردد

هالجيش المن إجه و بالطف تحشّد

إلهم الأكبر برز يا ربي إشهد

ايذكرني وجهه ابوجه جدي محمد

و هالعسكر ابليه أسباب....جرّد للمنايه احراب

و لمن ينذبح هالشاب....باجر اشينطون اجواب

هذا الموقف ذوب جبدي.... ذوب جبدي

و قلبي اعليمن يلهب نار....عالأكبر لو عالمختار

هالأمه حيف ووسف نكرت عدلها

سفك الدمه و الغدر أصبح أملها

الأكبر ابوجه النبي اتوجه إلها

اشلون الأمه هذي اتقاتل رسلها

وادم عالظليمه اتحوم....لو جان النبي ابها اليوم

هم جان اعتنوا له القوم....سفكوا للرسول ادموم

إتعنوا للطف وقفوا ضدي ....وقفوا ضدي

اعليمن تهجم هالأشرار....عالأكبر لو عالمختار

الأكبر لون يبرز و للحومه يطلع

ينهار عزمي و ركن حيلي يتصدع

لو شفت جسمه هوى ابحومة المصرع

أفتح أبواب الجفن و انزف المدمع

اشلون اصبر عالأحزان....أشوف إقبالي بالميدان

شبه الهادي عالتربان....طايح و اتحيطه العدوان

ينفذ صبري و ميظل عندي.... ميظل عندي

و حزني اعليمن هاج و ثار....عالأكبر لو عالمختار

لو شفت إبني انصرع و انسفك دمه

أصرخ محمد وقع عالغبره جسمه

أقصد ابلهفة قلب و أتعنه يمه

و من مجره نحره اليسح إقعد و اشمه

لو شفت الجسد مطروح....أناديه ابعويل و نوح

هذا ابني علي مذبوح ....لو دم النبي مسفوح

فوق اجروحه أفرش خدي أفرش خدي

و أصرخ إلمن فكري احتار....عالأكبر لو عالمختار

ابيا عين أشوف الولد وسط المعاره

ابهيبة محمد لكن دمه ايتجاره

بالقلب مشعل حزن ما تطفه ناره

دمعي جمر عالأكبر يلدع شراره

لمصابه تشب نارين....من يرتمي ابحجر البين

فيض ادموعي ما ظن يجدي .... ما ظن يجدي

اعليمن هالمدمع مدرار....عالأكبر لو عالمختار

من اوداع الأكبر بدت لحظت عذابي

و انرسمت اعله الجفن صورت مصابي

لو غاب الأكبر أحس يقرب غيابي

ما يلوي جف الأجل لوم و عتابي

و اعله الأجل و المحتوم....ما يجدي اعتاب و لوم

و اعلينه القدر مرسوم....حق نصبر اعله المقسوم

عقب الأكبر يقرب وعدي.... يقرب وعدي

و اعليمن شاءت الأقدار....عالأكبر لو عالمختار