حفر عيني الدمع و اجرى ادمومها اتصوبت و الناس ليش اتلومها

سال دمع العين من صب الدمع و مهتضم عايش زماني و منفجع

من شفت آل الرسول ابيا وضع ابعام ويَ الأمه أصبح يومها

من بعد ما راح هادينه الأمين الناس عافت عترته و حرفت الدين

الغدر و التحريف من اشجم لعين ابسيف و ابسم الأصول ايرومها

صار فقد الهادي للأمه امتحان عن هدى الإسلام غيرها الزمان

راح كل واحد إله ايشيد مكان و الوصيه غيروا مفهومها

عقب جمع الشمل لنها امقسمه و بدت غدرتها ابظليمة فاطمه

و ابغدرها انغصب حق حامي الحمه و سيد الأمه صبح مظلومها

عيني جنها شاهدت عصرت الباب و حيدر ابمحرابه بالصارم انصاب

اعليه روح القدس صوبت بالمصاب و رغدت اعيون الأعادي ابنومها

كل هلوضاع الحسن بيها يمر عاشت اوياه المحن طول العمر

تالي لن ابسم أميه ينغدر و ما رعت عهده اميه و قومها

و أبو اليمه عل المحن كلها صبر اتسمه بيها ابإسم مظلوم الدهر

ابكربله اشعملت بني حرب و صخر ابجتل لحسين انكشف مكتومها

احسين شاف الأمه من صاعد يزيد اشتره دينه و عزته ابدم الوريد

دم أبي الضيم ساد اعله الصعيد و بقت أنصاره صريعه اجسومها

هالمحن كابدها زين العابدين اميسر أخذوه من عقب جتل لحسين

بقه ايعاني ابصبره جور الظالمين و حمل كل ذيج الغصص و اهمومها

و محنة الباقر ورث منها المحن ما رغد له العيش يوم امن الزمن

مات مسموم و مثل عمه الحسن و خذمت جبدته ماضي اسمومها

صادق أهل البيت شاف أدهى و أمر من محن جده و أبوه اللي صبر

من بني العباس ساعدها الدهر غيبة من سمه الدوم انجومها