كلما تمر بينه اهموم ... مصدرها من هذا اليوم

و اتوضحن ... هاي المحن

مصدرها من هذا اليوم

صحف مكتوبه بالآهات عليها تشهد الأمه

محن و امصايب و نكبات و أزمه من بعد أزمه

مصادرها و بدايتها من غيبة نبي الرحمه

منها و تستمر ظلت هوان و فاجعه و نقمه

جم ظالم و جم مظلوم ... مثل النهر تجري ادموم

و الدم رخص ... كل الغصص

مصدرها من هذا اليوم

إذا سائل سأل مني عليمن تسجب العبره

أقله اعله الضلع أبجي و أنوح الفاجعة كسره

إذا ناشدني منهو اللي هضم بنت النبي الزهره

أقله غيبة المختار هي بالوضع أدره

إنشدضلعها المهشوم ... و يخبرك بالمفهوم

كسر الضلع ... موج الدمع

إذا رايد بعد يسأل عليمن منهضم محتار

أقله قطعت قلبي و دهتني طبرة الكرار

الطبره الصوبت حيدر و تركت جم جرح جم نار

إذا رايد سبب عنها إنشد غيبة المختار

هذا المصاب المحتوم ... بعين الإله القيوم

غاب الولي ... طبرة الولي

و بعد يالسائل أروي لك ثالث فاجعه و امصاب

قبل ما تسأل آنه أنطيك من سيل الدموع اجواب

لونك عالحسن تسأل تقلي اشلون جبده ذاب

الحسن مسموم نعتبره و من جده محمد غاب

و احنه الحزن بينه ايدوم ... نجري الدمع عالمسموم

جبد الحسن ... نار الفتن

لون حاضر رسول الله بالطف شنهو تتوقع

يقدر ينظر أولاده و كلمن طايح بمصرع

و هم يقدر يشوف احسين جسد بالمعركه الموزع

و هم يقدر يشوف ايزيد اعله عرش الحكم يتربع

اعليمن نبث هذا اللوم ... و الحاكم أصبح محكوم

هذ الألم ... حرق الخيم

عجيبه احسين يتوسد و جسمه يسكن التربان

عله منبر رسول الله و يصعد هالرجس مروان

و الاعجب بعد من هاي مصيبه اتحير الأذهان

الوليد أصبح أمير و صار بيده ايمزق القرآن

و دين الله أصبح مهضوم ... بحكم الوليد المشؤوم

كل هالظلم ... نار الهضم

مصايب تستمر ظلت بعد للشرح ما يحتاج

و الوليد و مزق المصحف اشيظل بالدين يا منهاج

الامه احتارت بمروان و يزيد و شمر و الحجاج

و يظل دم الغريب احسين يصب و امخضب الأوداج

لا تعتب اعله المالوم ... لو فارقت عينه النوم

ادموع الجفن ... جمر الحزن

بجفن دم و دمع يجري ننوح الفقد هادينه

جمر كسر الضلع لليوم ناره تستعر بينه

غصص طبرة علي ظلت تصبحنه و تمسينه

عله افراق الحسن زادت مصايبنه و مآسينه

و بكربله نار القوم ... خلتنه باللوعه انحوم

سبي الأهل ... و اللي حصل