بالعترة وصى المختار.... چانت تسمعه أصحابه

راح النبي وشوف اشصار ....بالعتره بعد غيابه

الينكر محمد يا بشر من يريد ينكر وصيته

كل المصادر أكدت وصى الناس عن أهل بيته

لو ردنا نسأل عالسبب نكروا ليش ليلة منيته

راد إلهم الخير النبي لمن راح .. رادوا أذيته

للهادي بغض الأشرار ....معروفة زين أسبابه

حجة وداع المصطفى و التبليغ عن الولاية

مصدر سبب هذا الحقد للتكفير چانت بداية

من رفع إيد المرتضى داحي الباب سيد البراية

و الحسد بَيّن و البغض و ل هاليوم ننطي ضحاية

ضد الوصي حامي الجار.... صارت الأمة ذيابه

أول ضحية فاطمة خلف الباب كسروا ضلعها

بضعة محمد بالحزن ليل نهار يجري دمعها

جي صاحت الوالي علي صابه الغيض لمن سمعها

بالمحسن و كسر الضلع چف ملعون أول فجعها

لان دمعة أم الأطهار.... فوق الوچن سچابه

سنوا على العترة الظلم يوم البيه ظلموا الزهره

مابين سموا چبدته و المذبوح خلصوا العتره

وهذا علي الهادي التقي بسامراء هَدِّموا قبره

نفس الأشرار ابكل زمن موجودين للحقد زمره

كُفروا بدين الجبار.... حاربوا نور كتابه

سامراء صورة فاجعة كل مضمون سر اعتقادي

للثار كل صبح و مسه بيها يصيح صوت المنادي

يمتى يصيح المنتظر يا مظلوم يا علي الهادي

هَدِّموا قبرك و السبب جدك چان بالفضل بادي

و بيا وگت راعي الثار.... ينهض يصفي احسابه

لو كل مصيبة سيدي نقول اتهون يبن الزچية

مانقدر ليوم الحشر ننسى اشصار بالغاضرية

جدك احسين بلا ذفن ثالث يوم چثته رمية

و عمِتك زينب عالهزل لأرض الشام راحت سبية

شِبحت لأخوها الأنظار ....امسلبة اتشوف ثيابه