دسمع ياراعي الرايه..... هالرايه

يوم الحرايب چالگطب.... وتسيّر أفلاك الحرب

بالقاعده الحربيه

زينب بخدر المحصن بالسمر وسيوف أهلها

لن تشوف النور مشعل زهر بالخيمه وشعلها

طلعت تشاهد النور وشافته بوجه الكفلها

وبذروة الراية سفر..... صاحت يمن لختك فخر

دسمع يبو فاضل خبر.... رايتك واعرف فضلها

من إسم الأعظم آيه ...... هالرايه

من ترفل بجو الخطر..... ما تنطوي وتطوي الدهر

بالقاعده الحربيه

يعباس إعرف فضيلة رايتك واعرف قضاها

مظلم وعالجاهليه غضب ويتراعه بصداها

نشرت أحكام الرساله وإنبنه الدين بذراها

دارت بهالعالم فلك.... من زمها ساعد والدك

واليوم زمها ساعدك..... واصبحت إنت فتاها

للحرب تذهل رايه..... هالرايه

بيها الحرايب تعترف.... والكون يرجف من ترف

بالقاعده الحربيه

وبمسير الضعن تذكر ناگتي من گلطتها

وعلى الناگه إنصبت هودج شرف والرايه انشرتها

وشبحت لرايتك عيني وبشر گلبي من شفتها

راية بسعدها مهلهله..... والسفر وياها يحله

من المدينه لكربله..... لازمتني ولازمتها

روحي بجسم مسرايه...... هالرايه

ودريها للخايف ذره.... تظهر معاجز حيدره

بالقاعده الحربيه

گطّع رچاب المطهّم من تمطّى وطفح زوده

والرمح هزه بيمينه وللرمح فصّم عجوده

وصاح هذا السيف يختي حددي لخدرچ حدوده

يمدللتنه تدللي..... وحارس على بيوت الوحي

مترشح براية علي... يفدي للرايه وجوده

من ترفل على السايه..... هالرايه

تنشر أماني العايله... والمايهاب تچفله

بالقاعده الحربيه

ياگمر عدنان تذكر من طلعنه من المدينه

منهو دگ صدره وكفلني وگال انا حامي الضعينه

وإنت بعدك بالحياة وماي ما يحصل بدينه

مثلك يظل مخيمه..... بيه تشتعل نار الضمه

إدرك ودايع فاطمه...... وإخذ جودك من سكينه

ومفتاح المسنايه..... هالرايه

وعلى الفتح متعلمه.... رايتك من حامي الحمه

بالقاعده الحربيه

يختي وانه الگلت عندي وبعد اگول النوب عندي

وإنت تدرين بحياتي ما خلفت وياچ وعدي

وماظل مگيود ذمه وكون أذب عالماي جهدي

وبساعدي سيف الوفه ..... وبجسمي روح العاطفه

برضاچ لو حظي إكتفه.... صدگ ويه حسين عهدي

ودرّه بصدف منوايه..... هالرايه

ماتوگف بحدها الزلم.... طي السجل تطوي الحزن

بالقاعده الحربيه

عالوعد رايح يزينب واليواعد كون يوفي

لو اجيب الماي لو عالماي تتگطع چفوفي

وينفگد خدرچ يزينب مثل ما ينفگد شوفي

وراسي العمد لو هشّمه.... بيتچ عليّه تهدمه

وخوفي لودايع فاطمه.... مو على الچفين خوفي

ومن تنصرع ويايه.... هالرايه

عالمشرعه تخلّد مجد.... لليحمل الرايه ويجد

بالقاعده الحربيه