ياواليها يا واليها يحسين الزينب حاجيها

زينب يحسين ابهالوادي مذعوره امن الخوف اتنادي

خويه اقعد لعيال الهادي سجت يحسين ابواجيها

يحسين احتارت أفكاري و أصفج يمناي اعله ايساري

يحسين امودع بالباري لعيالك منهو ايباريها

يحسين اقعد شوف العيله شوف أطفالك ابها الليله

و أم جلثوم و رمله و ليله سجت يحسين ابواجيها

يحسين و سكنه المهضومه لمصابك ظلت مالومه

بالطف محتاره و مظلومه و الدمعه عالخد تجريها

يحسين اتصور لدموعي يحسين و محنيه اضلوعي

يحسين و ما يسكن روعي يحسين إختك من يحميها

جم شاب اعله الغبره اتوسد نار امصايبهم تتوقد

بالدلال أبداً ما تخمد نار أحزانك شيطفيها

يبن أمي و جارت أيامي من عقبك طوت أعلامي

يحسين من انظر لخيامي و النيران اتوجر بيها

يحسين و لمن أتفكر لعيالك يحسين الخدر

بين الخيل اتقوم و تعثر و الكوفان اعداك اميسريها

يحسين و ما ظلت جاره يبن أمي ابشبلك محتاره

وجعان و دمعه يتجاره لعيالك لو صد اعليها

يحسين إعداك امطوقينه حرقوا يحسين اصواوينه

دم أحمر فجّر من عينه يحسين الشامت ياذيها

يحسين اتكفلت إعيالك يبن أمي و باريت أطفالك

بدلالي و جمرة دلالك تسعر عالناقه حاميها

يبن أمي رحتوا و عفتوني يبن أمي اهنا ضيعتوني

يبن أمي و يا نور اعيوني لختك بالطف امخليها