بس الحرم ظلينه .... لا واحد ينغر لينه

من عفناك.. يا بو اليمه .... روحي اوياك.. يا بو اليمه

يخوتي اظلمت الدنيه عليه .... ودايع فاطمه رحتوا من اديه

عطاشه اقضيتوا برض الغاضريه .... عليكم جالت اخيول آل اميه

خيل اللي اعليكم جالت .... و النوب اعلينه صالت

خيل اعداك.. يا بو اليمه .... روحي اوياك.. يا بو اليمه

عله الغبره الذرر مني سروها .... زهور المصطفه الهادي اخطفوها

عقبكم و الخيمنه وجروها .... الفواطم روعوها و فرهدوها

و اعليك ظل في الصيوان .... وحده ما بين العدوان

من عفناك.. يا بو اليمه .... روحي اوياك.. يا بو اليمه

يخوتي اعله الدهر ليكم عدوكم .... يريدون الدهر يمحي أثركم

جفوف اليمه قيدوها عقبكم .... عليل اتقيد و قيدوا حرمكم

حامي الظعن جفينه .... فوق الترب و امشينه

ودعناك.. يا بو اليمه .... روحي اوياك.. يا بو اليمه

غصب و ابكربله عفناها للحوم .... وذر متقطعه من عدها لجسوم

و أخذنه اويه الظعن ويانه لهموم .... تمنينه القمر من نومته ايقوم

لزنوده اتعود الجفين .... و ايحامي لعيال الحسين

و ايتاماك.. يا بو اليمه .... روحي اوياك.. يا بو اليمه

ترد لزنوده جفينه السخيه .... و يشاهد لنشامه اعله الوطيه

عله التربان ابن زهره الزجيه .... يشاهدني الدهر وشسوه بيه

خل ينهض و يصد لينه .... و من العده ايحامينه

أرد أنخاك.. يا بو اليمه .... روحي اوياك.. يا بو اليمه

يعود الزينب ايباري ظعنها .... يخفف للفواطم منها ونها

يرد لسكينه ليها يوفي ظنها .... و أنشده اعله الذرر منهُ الدفنها

لاجن شبه النسمه ابصيف .... مريتوا اعليه يا حيف

و افقدناك.. يا بو اليمه .... روحي اوياك.. يا بو اليمه