ذكرياتك يحسين عشنه وياها ....و خذنه معناها

بالفكر بالفكر .... خالده ابكل عصر

ذكرياتك يحسين عشنه وياها .... و خذنه معناها

قبل لا نبدي نصور صور عن جوهر صفاتك

ناخذ استعراض وافي عن معالم ذكرياتك

امن الولاده للشهاده اتكرست للحق حياتك

منبرك أصبح جامعه .... ينطي دروس و منفعه

و احنه ابفكرنه انتابعه .... و عن وعي نتبع خطاتك

يالحياتك للناس جامعه صارت .... للعدل شارت ....فكرتك تستمر

ندرس آفاق الحياة الحره من أبعاد فكرك

مصدر الأعراف ذاتك ياللي كنز العلم صدرك

درس موضوع اكتسبنه و هالدرس قطره من بحرك

ابمجمل الفكره الواعيه .... اعرفنه الحياة الساميه

يا رمز أهل التوعيه .... و مشعل التاريخ عمرك

يا منار الأفكار فكرك الخالد ....للعدل رايد ....ابحكمتك منتصر

انقدس المنبر و نعرف ليش هالمنبر تقدس

هذا منبر للتعاون للعدل للحق تكرس

و هذا محفل للمواعظ للوعي للعز تأسس

ابهاي المجالس نتصل .... باجر اعليها ننسأل

منها اشعرفنه يا فصل .... و يا درس بيها درسنه

يالتناشد عالحال .... تدري شدرسنه ....من مجالسنه....مدرسه و تزدهر

هي مو حالة خطيب ابخطبته يجلب نواظر

و لا قصيدة شعحته انقول بحدود المشاعر

المسألة مسألة فكره اتحرك أصحاب الضماير

خل نسأل ابجلمة ورع .... يا شخص من عدنه انتفع

و شقدمت للمجتمع .... هالمجالس و المنابر

قدمت للأجيال فكر هاديها .... و سر معانيها.... عالعدل تقتصر

ذكريات احسين مو بس عالقصايد و الخطابه

كتب نهجه و الأجانب حصلوا منها الكتابه

صنعوا و اتقدموا و احنه اعله الشغب و الاستغابه

و احسين ما راد الجهل .... راد العلم ويَّ العمل

عالحجي الفارغ لا نظل .... اشننطي للسائل جوابه

انصيح يحسين اتريد ندرس أبعادك .... هدف إرشادك.... فكره ما تندثر

احسين راد الأمه تصحه و توصل الأعله مراتب

ما يريد الجهل الها و العلم عند الأجانب

راد خير المجتمعنه احسين ما راد المتاعب

رايد امن المه تجد .... حته تحصل عالمجد

و ما راد منها تعتمد .... عالمعاجز و المناقب

انقول يحسين انقول انت تهدينه .... الفكر هادينه.... ابصرختك مقتدر

ابها الهدف احنه نصبنه المجلس و خذنه المنافع

اعرفنه يحسين انت عزنه و انت للأمه تدافع

و انت ملجأنه و كهفنه و انت يوم الحشر شافع

مولدك تحرير البشر .... و نورك الوضاح انتشر

و العالم العلوي ازدهر .... و بدرك ابها الناس ساطع

انت نور الأحكام و انت رائدها .... و سر عقايدها.... شعلتك بالنصر