اخويه و آنه اخته .... شفته و ما عرفته

وين أنطي الوجه وين .... أنشد من عله احسين

سكتت الحومه ابحزنها و كل جرح بطل مسيله

نقلت اجذام الهضيمه و زينب الحره العقيله

قصدت المصرع اخوها احسين ابن حامي دخيله

قعدت ابكتره و تنظره تبجي و المدمع تسيله

أحلفك هذا انته .... ابحليب أمي الرضعته

عماني ابفقدك البين .... أنشد من عله احسين

يالمشيت ابهيبة أمي و جدي و الكرار الأنزع

و مثل أبو امحمد اخويه السره بأوصافك تودع

اتغيرت ذيج المعاني و جسمك الطاهر توزع

لا علامه البيها أعرف كل عضو منك تقطع

سالم ودعيتك .... و امقطع لقيتك

ابحيره و تهمل العين .... أنشد من عله احسين

و قلبي يم جثة ولينه من تحت بهمومه حاير

أغسل اجروحه ابدمعتي بلكه يروه امن النواظر

و الضلوع أشلون ألمها امهشمه ابسحق الحوافر

وسفه و ابن امي الأعادي استوحدوه ابلا مناصر

لون تنظر وضعنه .... عقبكم و الله ضعنه

إذا نرجع مظعنين .... أنشد من عله احسين

امحسبه أصل ليك و أعينك يا عزيز أمي الشفيعه

جيت أسند لك يخويه و نعتني الصوب الشريعه

حته أشوفن حامي خدري و أنظر اجفوفه القطيعه

و أرد أقله اشلون عينك نامت و عفت الوديعه

جسمك من نظرته .... العذر منك قبلته

يخواني يا طيبين .... أنشد من عله احسين