عشقتك يا إمامي عشقتك .... حبيبي على قلبي رسمتك

إلك اهدي أمل ودي .... إخذ عهدي يبو الأكبر

يريحانة رسول الله و سليل النبي المختار .... أبوك المرتضه حيدر قسيم الجنه و النار

إمام و أمك الزهره أخوك المجتبه صار .... إلك يا والد التسعه الأيمه الغر الأطهار

أوقع بيعة الحب بديه .... و أقدم لك حياتي هديه

مثل أضرب .... إلك بالحب .... إذا تطلب .... يبن حيدر

إذا روح القدس نازل يهز مهدك بالأفراح .... إذا فطرس مسح جنحه و رجع له ذاك الجناح

بعد إلمن يلومونه يا مالك حبك أرواح .... سكت صوتي و لساني ابدم إلك يبن النبي صاح

نحبك يا شعاع الإمامه .... و حقك ما تهمنه الملامه

كرامتنه .... ابعقيدتنه .... مودتنه .... إلك تكثر

إذا جدك رسول الله هواك ابقلبه مكتوب .... إذا حيدر قبل حبنه دليله ابحبك ايذوب

بعد ليش اعله هذا الحب يلومونه يمحبوب .... و حقك مو قلب واحد تحبك كل القلوب

عرفنه هذا حبنه و هوانه .... عقيده من أصول الديانه

نهج ربك .... رسم دربك .... يمن حبك .... غصن أثمر

اشكثر يا غيرة الباري إلك ظهرت كرامات .... محافلنه جعلناها درس يا طيب الذات

لجل حبك عواذلنه بدت منهم ملامات .... شعايرنه يحسبوها بدع هذي و خرافات

موالي حجيه وسافه .... شعايرنه جعلها خرافه

حجي الباطل .... صبح فاشل .... مشه العاذل .... عله المنكر

ملايين البشر احنه يمحبوب الملايين .... عرفنه دربك الطاهر نجاح الدنيه و الدين

نقيم غلكم شعايرنه و نظل الكم موالين .... عله اعناد اليعادونه و يحسبوهم محبين

شعاير هذي عدنه و مجالس .... جعلنه هالمجالس مدارس

العلم يمنه .... تعلمنه .... تفهمنه .... من المنبر

وجودك يا رعاك يطهر هاي الأفكار .... مشينه ابدربك الواضح ولا يجرفنه تيار

يفوز اللي على خطك يبو الأكبر مشه و سار .... شعايرنه نفع و أبد ما بيها أضرار

هدفنه بالمحبه تحقق .... عهدنه بالمسيره توثق

عشق بينه .... يبارينه .... يدلينه .... عله الكوثر

ابضمايرنه يبو الأكبر الك سجلنه مضمون .... أهل بيت النبي و ربنه لجلكم شيد الكون

تفرحون احنه وياكم فرحنه من تفرحون .... تحزنون احنه هم حزنه إذا لحظه تحزنزن

سعاده و احنه بيها صدحنه .... فرحكم يا حبيبي فرحنه

محبتنه .... بإرادتنه .... و سعادتنه .... حلم أخضر