يبني علي يبني علي .... ابنار العطش رديت إلي

ابزودك رحت و اتوسطت ساحة الميدان

مثل الغضنفر يا علي قاوم الفرسان

ما أدري ترجع للخيم يوليدي عطشان

تشجي الضمه .... تشجي الضمه

رديت إلي و تشجي الضمه

يا مهجة إحشاي .... ما يحصل الماي

لن صوت لكبر جاوبه يا بويه يحسين

ما همني ثقل المعركه و امناور البين

لجن فطر جمر الجبد دلالي نصين

ذاب القلب .... ذاب القلب

و اشلون أقاوم هالحرب

و أستقبل إعداي .... ما يحصل الماي

آنه أدري قلبك بالعطش يا الأكبر ايلوب

و قلبي مثل قلبك صبح يوليدي منشوب

هذا العليّه يا علي امقدر و مكتوب

وقت العسر .... وقت العسر

وصانه ربنه بالصبر

يا أمل دنياي .... ما يحصل الماي

انته ابعطش و آنه ابعطش مستعره قلبين

و امن أجيب الماي الك يا الأكبر من انين

لو ترضه يبني يا علي أعصر لك العين

و من الحزن .... و من الحزن

أعصر إلك موح الجفن

و أشرب يا رجواي .... ما يحصل الماي

يوليدي شح ماي العذب و الأمل مفقود

ودعني يبني و اتجه للمعركه اردوود

آخر وداع اوياك إلي لو رحت متعود

لاح الكدر .... لاح الكدر

عقبك يظل بس القهر

و النايحه اوياي ....ما يحصل الماي

بالحومه لو ضامي طحت ما بين لشرار

مصرعك تحضر فاطمه و يحضر الكرار

يسقيك من ماي الخلد جدك المختار

و ابها الأمل.... و ابها الأمل

شد يبني حيلك عله الأجل

يا واسع الراي .... ....ما يحصل الماي

ذب عللدرع قلبه و شهر صارم الإيمان

صبر النبي و زود الوصي علحومه غضبان

من عقب ما أده الوفه حان الأجل حان

بالتضحيه.... بالتضحيه

سجل صحايف ساميه

و بعهده وفاي .... ما يحصل الماي