ناحت سكنة و زينب يمها**و انشغلت كل وحدة ابهمها

سكنة اتذكرت عمها و ناحت**و زينب ذكرت نحر ابن امها

***********

حالة سكنة و حالة زينب**خلَّن قلبي و قلبك ينحب

قعدن وحدة تقابل وحدة**مانعرف يا حالة الأصعب

حسرة بحسرة و دمعة بدمعة**هاي التبجي و هاي التنحب

وحدة تخاطب وحدة و تسأل**جم كوكب من عدنا تغيَّب

بين الجمرة و بين العبرة**هامت كل وحدة بعالمها

**********

يا هو الأول تبدي و تشرح**خل نسمع بالدمعة التسفح

أول زينب شرحت همها**طاحت بالهم قلبي مجرَّح

من يوم اللي طاح ابن أمي**شفته موذَّر وسط المذبح

لليوم آنة و دمعي مناور**هو يفيض و آنة الأمسح

شقد يشابه نحر أبن امي**جرح عيوني الينزف دمها

***********

صاحت سكنة بمدمع يهمي**همج يا عمة بقد همي

يكسر ظهري الناقة مصابي**ما من طود اليحمل هضمي

طيف العباس يراودني**صرت أشعر ما مَيِّت عمي

أمشي و أهجس يمشي وياية**لمن أقعد يقعد يمي

أحجي و اسمه بطرف لساني**الله يعيني تُفقد عينه

*************

زينب صاحت حقج لمَّن** عالعباس عيونج يهمن

مو هَينة التفقد غاليها**جروح حسين بعيوني انرسمن

جن ما هشموا منه ضلوعه**أشعر جنها ضلوعي انهشمن

و منازع آنة و حسراتي**كل ما أنثرهن يلتَمَّن

شيجَمِّع حسرات مصابي**و دموعي السالت شيلمها

*************

أسمع شتجاوبها سكينة**غراب البين يحوم علينا

آه على الطايح علشاطي**و الموت أفرق بيني و بينه

كلما أمسح دمعة عيني**أذكر سهم الصَوّب عينه

كلما ألطم و بكل جفي**أذكر من قطعوا جفينه

كل عمود الهشَّم راسه**جن صوَّب روحي و ألَّمها