كصدت لخوها احسين .... صاحت ينور العين

بين اعيال نيتكم اتوعودني

وبهالحال نيتكم اتودعوني

زينب آنه يالوليان من الزغر مهمومه

من والدي و من أمي بغدر الدهر محرومه

كبرت و كلت خواني أهل الفخر معلومه

سدوا خلتي و آنه بجال اخوتي محشومه

و اني بعزة اخواني .... همي يزول و أحزاني

لو ودعت ولياني .... أظل وحدي مهضومه

من صاحوا للوادع .... حسبت خذري ضاع

دمعي سال كالجمر من اعيوني

طول الدهر ظنيته ملتم هالشمل ايدوم

و يوم الكربله طبيت بشوف العين شفت القوم

خيل و زلم ملتمه أبدن ما لفاني النوم

هذا اليوم وياهم من العمر آخر يوم

يا روحي انكطع ظني .... و طحت بحسرتي ووني

و باجر لو مشوا عني .... غريبه و القلب مهضوم

هذا الزمن غدار .... خلاني بين أشرار

مو بالبال لن اخوتي ايعوفوني

تمشي و تعثر بهمها زينب لفت يم احسين

و مثل المطر دمعتها كامت تحفر الخدين

هاي القوم يبن أمي اعلينه دارت الصوبين

يبن الزهره و شعدها تطلبنه بطلب و بدين

شنهي اللي يريدونه .... جنهم ما يعرفونه

و نيتهم يغذرونه .... و جا ننطي لا وين

بالعز إجيت اوياك .... توليني خويه اعداك

ناس أنذال ما صدق ايرحموني

يا زينب يكل الها صبري يختي عاليسدي

كفيله انتي بعيالي يم الخدر من بعدي

اشرايج لو تشوفيني ما بين العده الوحدي

يختي و سهم المثلث لمن يعتني الجبدي

صاحت لا تعذبني .... و سهم الهجر صوبني

و هذا الخبر شيبني .... غيرك يالولي اشعندي

لو كبلك خويه اتمنيت .... خويه أنذبح ياريت

و الأطفال لو عنك ينشدوني

كصدت يم كمر هاشم إخته اتريد تحجي له

منهو الكافل اظعوني خويه بعد هالليله

لمن يهجم العسكر اعلينه ابناره و بخيله

و منهو اليحفظ الأطفال منهو اليحرس العيله

نار الحزن و الآمي .... نار التشب بخيامي

يا خويه و قلبي الدامي .... بعدك ينهدم حيلي

خبرني يا عباس .... يا صاحب النوماس

و الآمال خابت و كل اظنوني

يا عباس اجيت اوياك آنه بهيبتي و قدري

بوجودك يراعي الزود سالم يالأخو خذري

يا بالفضل لو يخفي ضيك جا شلي بعمري

بعدك بالهضم أبكه و أقضي بالحزن دهري

خييك لو سبونه .... نور اعيوني يطفونه

تدي اللي ايسلبونه .... و انته بعزتي تدري

و لني بحكم الظلام .... و أمشي بيسر للشام

و الجتال هو اليباري اظعوني