يا نسيم إگصد إمامي.....إحمل إدموعي و سلامي

گله مسلم وحده حاير.....لا نصير و لا محامي

إخذ من عيني دمعها و إخذ من قلبي السلام

يا نسيم الطيب عرج و إگصد الصوب الإمام

گله يحسين الردت طلعت ابعكس المرام

و الذي گالوا نبايع سلوا ابوجهي الحسام

يا نسيم الكوفه كوفه .....ترجم الحال التشوفه

من تمر بحسين اريدك.....بالحزن تنقل كلامي

يا نسيم الهاب لمن توصل الضعن الحبيب

گله يا مظلوم أصبح موت ابن عمك قريب

الناس باتت عالضلاله و للأمر ما تستجيب

أمس قائدهم جنت إلهم صرت هالليله غريب

و البشر هذا طبعها.....ابسرعه تنقاد الطمعها

ابسرعه تخدعها المطامع..... و المظاهر و الأسامي

من هوان الدنيه يصبح ابن مرجانه أمير

الثعلب اعله الگاع يمرح و الأسد واگع أسير

بايعتني الناس كلها اشلون عدواني تصير

بأرخص الأسعار عندهم صار ينباع الضمير

بالحجر داروا عليه.....و الرماح السمهريه

و ابنبلهم حاوطوني..... و سددوا كل المرامي

فوق سطح القصر آنه و حان ميعاد الممات

واگف السياف يمي و بيده سيف النايبات

بگت لحظات ابحياتي راح أفارگ هالحياة

إسرع اعله حسين گله يا سفينة النجاة

دم ابن عمك تجاره.....من سطح قصر الإماره

روحه عرجت للمعالي..... و الجسم عالگاع دامي

يا نسيم و حين توصل للغوالب من مضر

لا تفاجئهم ابموتي لمن اتودي الخبر

كلمه كلمه اوياهم احجي لا يداهمهم خطر

و بعد عندي هالوصيه انكتبت ابدمعي الحمر

من تصل بنتي حميده.....قلها شوفتنه بعيده

و إبرفق إمسح دمعها .....من تشوف الدمع هامي

يا نسيم ابهيده لمن تبدي و اتحاجي اليتيم

لا تصدع گلبه و إعطف عاليتيمه يا نسيم

خبر حسين ابو الأكبر گله أتباع الزنيم

باعوا الفردوس الأعظم و ارتضوا نار الجحيم

من تصل يمهم اخبرك.....تاخذ الأسياف نحرك

ينجهل تالي مقامك .....مثلما جهلوا مقامي

و بالختام أختم كلامي ابدمعة اعيوني التهل

و أرسل اوياك التحية الخالصه الكل الشمل

و إعله كل طفله يتيمه بالضعينه و كل طفل

و اعله ربات الخدور و عايلة سيد الرسل

ادخلت بوابة مماتي.....و إنطوت صفحة حياتي

عاقبة خير و شهادة مسلم و هذا ختامي