يبني من عگب عيناك يابني....ذبني الدهر بين أجناب يابني

وانه تعبت برباك... يالرحت من إديه

****

بالربا تعبت على شانك... يبني وسهرت الليالي

يابني ردتك ذخر ليّه.... يا ثمر چبدي يا غالي

الدهر بعيوني رماني .... وعدم يا جسام حالي

هذي تقادير الدهر.....بدل أفراحك بالكدر

حودبت يا صبي النظر.....وذخر غيرك بعد مالي

يابني يا عزيز الروح يابني.....نشبني الدهر بسهامه نشبني

أمك ريت تفداك.... يالرحت من إديه

----

يابني ياعريس هاشم ... آه يا كوكب سعدها

سهم المگدر طفاها....الشمعتك وإنت ضمدها

چانت لمهدك تعاين .... دوم يا شمعة مهدها

برج الشهاده تغيبت.....شمعة شبابك وانطفت

ورمله يا جسام إنحنت.....عليك يا زهرة وردها

يابني الدهر بيت أحزان يابني...... يابني وگطع هرش الگلب يابني

سهم الصوب حشاك..... يالرحت من إديه

-----

الدهر يا زهرة وجودي.... گطع سباحة دليلي

شفرته گظت ضلوعي بيك يا مصباح ليلي

يابني سيف الصاب نحرك.. صابني وهدمه الحيلي

عگبك يا سباح الگلب.....ما وچد بعيني الدرب

من چبدي دم دمعي يصب.....يا ولدي ويكثر عويلي

حزني عليك طول الدهر حزني... يابني ولا اريد العمر يابني

چيف تزفك عداك... يالرحت من إديه

----

زفتك بيض النواضي... ياولدي بالغاضره

وهلهلت سمر العوالي.... وحوفتك فوگ الوطيه

يابني وبدال الملبس....انثرت نشاب آل أميه

حنوك من دم النحر.....وعليك نشاب إنثر

ولا هاشمي يمك حضر.....ياولدي ولا هاشميه

ظني خاب يا مدلول ظني..... يابني عليك أصب دموع يابني

حنتك صارت إدماك..... يالرحت من إديه

----

ردت لاچن خاب ظني.... ياولدي وخابت النيه

حوفتك تزهر گبالي... إنصبتها بألف نيه

هاي المنصه يجاسم .... بالخيم ظلت خليه

هم بعد اشوفك وابتشر.....وانظر لوجهك چالبدر

چنت لزفافك أنتظر.....زفتك صارت رزيه

مني رحت يا مهيوب مني...... يابني وحالت الأقدار يابني

عني حجبوا ضواك.... يالرحت من إديه

-------

والدك وصى يا جاسم .... لچن ضاعت هالوصيه

بزفتك تحضر عمامك.... يا شباب الطالبيه

وعمك يلبسك ثيابك ... وانه حنيك بإديه

من زفتك خاب الأمل.....وبگيت عگبك بالوجل

ياريت وافاني الأجل.....ولا اشوفك عالوطيه

وني فسر الجلمود وني..... يابني وخاطري مكسور يابني

روحي راحت وياك..... يالرحت من إديه

----

حگي لو ظليت عگبك ... أنتحب ليلي ونهاري

عليك يا سباح چبدي .... دمعي من الچبد جاري

ردتك توسدني بيدك ..... يابني والنعشي تباري

باريتك بفيض الدمع.....وانكسر من عندي الضلع

چبدي على فگدك منصدع.....عمك منفجع گلبه وينادي

جاسم ياولدي ومهجة أفادي..... عمك منفجع گلبه وينادي

عمري راح بعدك..... يالرحت من إديه