جاسم يا شباب الدين .... يبني ويا ضوه عيني

أريدك تنذبح لحسين ..... وبدمك تحنيني

*****

دگرب خل أشم ورود ... خدك وانسل جعودك

فگدتك والعگل مفگود .... مني وهايم بزودك

واعلگ يولدي بحدود .... عمك شمعة وجودك

لتنام على ردن الدين.... أوفي حسين توفيني

يا عريس يا عريس .... أوفي حسين توفيني

--------

صد لمه الولد بعيون .... نار ونور تتواگد

يهون الأمر يمي يهون .....ماني إبنچ وحامي الحد

إلچ عين التشوف شلون ..... اسوي للطعن مشهد

وگف وگفة علي بحنين .... لمحمد وذب عن ديني

يا عريس يا عريس... أوفي حسين توفيني

------

هلهل گلب رمله وهل .... دمعها بشوفة هلاله

يروح الروح يا منهل ..... نمير الگلب وآماله

يا مرتوب يمكمل ... يسور الخدر وظلاله

واعز منك يماي العين ... إنتصار حسين يكفيني

يا عريس يا عريس ... أوفي حسين توفيني

----

ماني إبنچ وگر عيناچ ... هودي من الفزع هودي

ثمر گلبچ نمير حشاچ .... رواني وانعش وجودي

الگطع النفس حدي وياچ .... ما گصر بمجهودي

يمي ولابد تشوفين .... لو عمرت ميداني

ياعريس يا عريس... أوفي حسين توفيني

----

صاحت هلا بهالنيه ..... وهلا بهمة الناويها

روح إچسب مراضيه .... العمك وأمك إرضيها

بيط جروح مدميه ..... تصير ودمعي جاريها

عليك إنرسم بالكونين ..... وبتنفيذه هنيني

يا عريس يا عريس... أوفي حسين توفيني

--------

عليّه فرضت الأحكام .... شهاده وكون أأديها

وشما تخبط الأيام .... بالصارم لصفيها

چفوف الدين والإسلام .... من دمي لحنيها

وخلد شرف بالدارين ..... وبالفردوس تلگيني

يا عريس يا عريس ....أوفي حسين توفيني

----

لوح بظهر المسفسر ..... يبني وعالمخيم طوف

وهز الرمح واتبختر .... وخل عين العيال تشوف

يسكن روعها وتستر .... بيك وتامن من الخوف

نودعه الباري الكونين .... يرعاك ويراعيني

ياعريس يا عريس ...... أوفي حسين توفيني