اتصيح الكَلوب .... ابحبك انذوب

يا علي الباري فرض حبك علينه

و احنه من عالم الذر بيك اقتدينه

اتصيح الكَلوب .... ابحبك انذوب

*

يا علي ابسابق النشأه البيها صرنه امن البدايه

الباري طينتنه اكتملها و من قعر بحر الولايه

انعجنت ابفيض الولايه من ولاك ارتجف مايه

حبك ابطينتنه انمزج .... و ضامرنه بالنور ابتهج

و الكان من إسمك لهج .... يا اللي إسمك أشرف آيه

وجنة الروح .... منك اتفوح

يا عطر دوحة الإيمان و يقينه

و احنه من عالم الذر بيك اقتدينه

*

يا علي انته الأصول الخمسه للدين و قيامه

منك التوحيد يبدي و النبوه و الإمامه

و العدل حكمه ابوجودك و انته ميعاد القيامه

يالحبك ابدمي اتحد .... يا قل هو الله أحد

يا البيك دين الله انوجد .... و انته منهاجه و أحكامه

انته أحكام .... دين الإسلام

انته دين الله و على هديك مشينه

*

ياعلي اتغذيت حبك من ثدي صافي المرضع

أمي غذتني الولاء و صار إلي بهالنعمه مرتع

والدي من أحسن ولاءه و فرعي من أصله تفرع

استارثت حبك من هلي .... و أصبح مذاقي و منهلي

و انغمر قلبي يا علي .... و بالولاء أصبح مولع

و اليواليك .... يلتزم بيك

عهد حبك بالضمير يسري بينه

*

يا علي استخلصت حبك من قلب صافي و موالي

و ظهر ناتج هالمحبه نور يسطع بالمعالي

و اتحد نور الولايه ابروحي و بخالص أعمالي

يا علي و من هز المهد .... حبك اويه الروح اتحد

و كل مفصل بجسمي شهد .... حبك يتمم كمالي

طينتك نور .... ابجانب الطور

يا علي اتكونه من فاضل الطينه

*

يا علي كونك ربك من ثناءه و لطف ذاته

و صاغ لك حلية صفات مدعمه بجوهر صفاته

و مثلت مرضات بينه و بينك كملة مكرماته

تيار نور اولايتك .... و رحمة الباري رحمتك

و اللي صفح عن سيرتك .... إصيامه ما يفيده و صلاته

انت سلطان .... هاي الأكوان

الرايد يضاهيك يا با الحسن وينه

*

يا علي هاتف القدره امن العرش وجه نداءه

وقفت إقباله الخلايق ويه رسله و أنبيائه

نظرة اعله اللوح شافت إسمك يشع بضياءه

و اشلون وقفه صادقه .... معناك ذات الخالقه

ابمعجزة شخصك واثقه .... و صاحوا إنقر بولائه

إنطينه العهود .... حبك اشهود

عهد بالتوحيد و اتساند نبينه

*

يا علي اكلوب التودك هايمه ابشوق المحبه

كل موالي ابقلم حبك إسمك مسطر ابقلبه

خطته احروف الولاء النورّت مصباح دربه

يا تاج أشراف المله .... ابهديك تسير القافله

لا مبعده و لا فاصله اشما تصير المشيه صعبه

احنه ماشين .... ابمنهج الدين

هذا عهد الملتزم بأحكام دينه

*