ليش الشمعه ...صارت دمعه ...يبني يا جاسم

زماني ... رماني ...ليلة عرسك

أنتظر هاي الزفه و أنسج أحلام ... جنت أحسب احساب الفرح

ما أدري هاي الفرحه تصبح آلام ... ون و دمع عرسك صبح

و إبدال ما يكلولي زفوا جسام ... قالوا لي جسام إنذبح

انخطف لوني ... و ضوه اعيوني ...يلوموني ...يا عريس

حيف ووسفه ... ابدال الزفه ...عالترب نايم

جنت أحسب العرسك يجاسم ساعات ... و أنتظر ساعة زفتك

و اقضيت كل هذا العمر بالحسبات ... و أحسب احساب الفرقتك

من دنت ساعة زفتك قالوا مات ... و العرس صار امصيبتك

ابذلت عمري ... ابتعب سهري ...مجنت أدري ... مني اتروح

ليش الحنه ... صارت ونه ...أنشد الوادم

كل يوم من عمرك أمل جان ايلوح ... هالأمل عايش بالنفس

و اطيوف عرسك ساكنه ابوسط الروح ... ما أدري تالي تنعكس

ما أدري عالتربان أشوفك مذبوح ... و امجفن ابثوب العرس

انصرع جسمك ... رحت يمك ...شفت دمك ... عالتربان

قلبي اتقطع ... فوق المصرع ...هالقلب حايم

يمك لفيت و للجسد قابلته ... صرت اتذكر أتعاب السهر

صبيت دمعي و بالدمع غسلته ... و غسلت طوفان النحر

جسمك يا جاسم بالقلب جفنته ... يالقبرك ابعيني انحفر

احرقت روحي ... ابجمر نوحي ...و دمه اجروحي ... اعليك اتسيل

دمعي الجاري ... زيد ناري ...هالدمع ساجم

أسعد ليالي العمر قضيته اوياك ... هيهات أنساها بعد

و أصعب ليالي العمر تقضي ابفرقاك ... نوح و مرارات و شدد

يا جاسم انت الروح و اشلون أنساك ... ما أنسه يومك للأبد

ابجرح ينزف ... بقيت أهتف ...إلك أكشف ... حالي اليوم

دمعي و حزني ... ابوجهك يبني ...فرقتك راسم

يبني انطفت هاليوم شمعة عمرك ... و انطوت صفحة دنيتك

ودعتك الله و الحسن ينتظرك ... بالخلد يتنه جيتك

إخذ الهديه اوياك من دم نحرك ... قله وفيت اوصيتك

يا من دمك ... كتب إسمك ...و اسم عمك ... ابصفحة نور

ابصفحة عمرك ... من دم نحرك ...للعهد راسم

للزهره يبني اوياك إخذ هالمرسوم ... و بلغ سلامي الفاطمه

راويها جفك خل تشوفك هاليوم ... متحني جفك بالدمه

قلها عفت عمي الغريب المظلوم ... بلايه معين و لا حمه

بأمر أمي ... ابذلت دمي ...لجل عمي ... عفته اوحيد

وصوا مثلي ... ضحوا قبلي ...كل بني هاشم