يالطايح ابمحرابك اهتز العرش لمصابك

هالليله هالليله اهتز العرش لمصابك

مو دمعه وحده اتسايله لا صرخه وحده ارتفعت صرخات بإسمك يا علي ابعالم العلوي انسمعت

نزلت الأملاك ابحزن يمك الليله اجتمعت يا ريت لا يطلع بدر لا شمس بعدك شعت

غاب البدر بغيابك و ابكل ضمير اصوابك

هالليله هالليله اهتز العرش لمصابك

بين الترايب و الصلب موقد قهر يتسجر لوعتك لوعه يا علي منها الأصم يتفسر

الليله غفت عين الخصم عين التودك تسهر جبريل يصرخ بالسمه ابمحرابه طايح حيدر

و كل نايبه تنتابك اتصوب ضمير أحبابك

عمرك ابمحرابك قضه تسجد و للرب تركع موضع سجودك يا علي أصبح الجسمك مصرع

طبرة الصابت هامتك ركن الديانه اتصدع عين الشرع لمصيبتك تجري و تسيل المدمع

ما حاسبين إحسابك دمك يصير اخضابك

امن الكوفه صرخات الحزن لرض المدينه اتصلت لجلك ينابيع الدمع من المحاجر هلت

اشلون ابن ملجم صوبك يا ريت ايده انشلت و ابطبرتك يا با الحسن عزة الأمه اندلت

اشلون الرجس ما هابك اتجسر عليك و صابك

ما زالت اقلوب الزلم من شوفتك تتريب يا علي و فرسان الحرب من هيبتك تتهيب

يا الجندلت عمر ابن ود و افضخت هامت مرحب اشلون ابدماك اتوشحت شيبك عفير امترب

كل شيعتك و أصحابك عفرها داري اترابك

هذا كتاب الله ابحزن لجلك تحن آياته و انجيل عيسه اينوح الك موسه تحن توراته

هالعالم العلوي هبط يمك يجر حسراته محتار إلمن يا علي يشكي هضم مأساته

العالم سجد يم بابك يتبرك بأعتابك

ناحت إلك روح القدس يا معجزة قرآنه انت كتاب الله النطق بالحكمه و انت إلسانه

هالليله يمك كل ملك بالهم يبث أحزانه جبريل يم قبرك حضر يتعفر بتربانه

كل سوره من إكتابك تنشد تريد إجوابك