الفضه اتغير ......عگب حيدر

كِلت يظهر ...... بده المحشر

صدق دمه انتثر يمه ...... ووكع جسمه ......بطل خيبر

هذا الأشر ابجفه و ردت له الشمس مرتين

ما كفه يمينه السيف هذا الضارب ابسيفين

نصرخ من نضح من جفك سيل الموت هذا الطاعن ابرمحين

گضه و رمح الشمس هاليوم ما مر اعله جفن العين

ابعلو الميزان أم راسه طبرها اشلون سيف البين

اشيظل بالدنيه لو عنها تغيب نور أبو السبطين

حزن مشتد ...... و لا ممتد

بغبار أسود الوكت غبر

جري المدمع ...... رسم مصرع

و حفر مضجع ...... بطل خيبر

هذا الترجف الآجال من اسمه و صعد راس الموت

و هامات العده ابجذمه جان ايدوسها و ايفوت

هذا اللي نصر طالوت و بسره كسر جالوت

و اشلون اليخوف الموت و ايرجف الموت هوه ايموت

عسن لا ناعيه تنعه و لا هذلت حمامه ابصوت

القلم و اللوح يتمنن لون صارن إله تابوت

يشيعينه ...... و يودنه

يغسلنه ...... عالكوثر

بمر ربه ...... بدت رهبه

و كضه نحبه ...... بطل خيبر

الكون اختل سكونه و ناح ابدمع مثل المطر منثور

و هذي نفحة اسرافيل تنفخ ناعيه بالصور

مراكب هضم محذوره و تيار الحزن حادور

دهتنه امصيبة الكرار و انصيح بقلب مجمور

أسد ربنه الطبر مرحب هالليله وكع مطبور

مصيبه و صابت الأملاك يا روح القدي مأجور

ختم عمره ...... ابدمه الطبره

وفه ابنذره ...... و لا أخر

و نذر عنده ...... دفن مجده

يطب لحده ...... بطل خيبر

الرازيا اترهت اعلينه ابراهاوت يذبل و صفوان

و ليلة واحد و عشرين مرت من شهر رمضان

تركت بالضمير اجروح تتنازف قهر و أشجان

و ما ظلت بعد عدنه لجروح التجينه امجان

ابحزن عشنه و بعد هيهات نخلع بردة الأحزان

فرايس للهضم صرنه عله اللي يدب الفرسان

جروح الهضم ...... فلا تلتم

اعله موج الدم...... غدت معبر

الجفن ينطح ...... دمع يسفح

صريع أصبح ...... بطل خيبر

ابدمع خاوه الجفن و الخد ننحب و الدمع غدران

عله الخاوه الرمح و السيف له الإنس و الجان

ألف حسره عله الجاعل جسم عمر ابن ود ديوان

و هالديوان بيه نزلت ضيوف الضبع و السرحان

ألف شهقه عله المصحف اشلون اندفن بالتربان

عله اللي كل عضو من أعضاه و الجسم قرآن

أبو العتره ...... سكن كبره

و بعد بدره ...... فلا يظهر

الترب حاجب ...... نسر غالب

وسفه غايب ...... بطل خيبر

النوايب غرزت الأنياب بينه و كل مخالبها

عگب غيبة نسر غالب الشيم ناحت غوالبها

المحن ما بينه نتحمل ثقل همها و مصايبها

مهجنه طبرة الكرار غدت تمرح نوايبها

القداسه اشلون ابن ملجم قدر يدخل مضاربها

اشلون الشيبة الكرار من دم راسها خضبها

ابوجهه مظلم ...... إجه المجرم

ابن ملجم ...... ربيب الشر

ياريته انشل ...... بكَيت أسأل

صدق جندل ...... بطل خيبر