هالليله حيدر ... بالجنه يحضر ... يم فاطمه ايبث الأخبار

يا محنه أكثر ... جمرتها تسعر ... هالطبره لو نار المسمار

حيدر حيدر يا كرار ... حيدر حيدر يا كرار

طاح الوصي بالمحراب و ضجت أملاك السمه... روحه اعتنت للفردوس هالليله يم فاطمه

و أم الحسن بالعبرات استقبلت حامي الحمه... مدت أياديها اتريد تمسح مسيل الدمه

و الزهره ناحت ... و ابعبره صاحت... هاليوم أنشدك يا كرار

يا محنه أكثر ... جمرتها تسعر... هالطبره لو نار المسمار

اتقابلوا تدري ابيا حال و اتلاقو ابيا وضع... ما ظهر منهم كل صوت و ما يحجي غير الدمع

عالطبره صدت بالعين و حيدر يصد للضلع... موقف يألم لو جان بالصخر هم ينفجع

بالدمعه نرسم ... موقف يألم ... بين الوصي و بنت المختار

يا محنه أكثر ... جمرتها تسعر... هالطبره لو نار المسمار

و المصطفه يمهم جان واقف يهل دمعته... الهادي انفجع من هالحال و اتغيرت حالته

مره يصد للكرار ينظر نزف طبرته... و مره يصد عين يشوف كسر ضلع بضعته

ننشهد محمد ... يا لوعه أزيد... منها القلب يتلاهب نار

يا محنه أكثر ... جمرتها تسعر... هالطبره لو نار المسمار

بنت النبي و داحي من شافوا المصطفه... خذهم حياء الوجدان من النبي و موقفه

حيدر ويه الزهره راح و عن الرسول اختفه... راحو و دمعات النوح فوق الوجن ذارفه

عالهادي ناحو ... من يمه راحو... و ابتعدوا عن الأنظار

يا محنه أكثر ... جمرتها تسعر... هالطبره لو نار المسمار

حين اختفو عن كل عين حيدر و بنت الطهر... ناداها يالزهره اشلون بعدج قضيت العمر

بين الحزن و الآهات بين المحن و الصبر... و اليوم إجيت ابها الحال امصوب ابسيف الغدر

و اتشاهديني ... امصوب جبيني... و دم راسي يشرح كلما صار

يا محنه أكثر ... جمرتها تسعر... هالطبره لو نار المسمار

انقارن يحيدر قلبين قلبك و قلبي انهضم... يا هو الذي أكثر شاف لوعه و مرار و ألم

ضيحوا جنيني اعله القاع و الضلع مني انهشم... و انطوت صفحة دنياي و بالموت عمري انختم

و أصبح مماتي ... بأول حياتي... يا حيدر إنشد باب الدار

يا محنه أكثر ... جمرتها تسعر... هالطبره لو نار المسمار

يا فاطمه شفت اهموم ما مرت اعله البشر... عايش وحيد ابدنياي و من عندي حقي انغدر

اسنين أحمل اهموم و ضيم وشكثر قلبي صبر... و من بعد ذيج الآم بالسيف راسي انطبر

يا حاله أصعب ... شيبي التخضب... لو ضلعج الصابه الغدار

يا محنه أكثر ... جمرتها تسعر... هالطبره لو نار المسمار