صوت جبرائيل بالأحزان ضج و من صداه ارتجت الأكوان رج

الكون مظلم وجهه و العالم حزين و بالسموات ارتفع صوت الأمين

انفقد هذا اليوم أمير المؤمنين و حادي ضعن الموت بالكرار سج

نزلت الأملاك تعلن بالمصاب تنعه روح الوحي و آيات الكتاب

اليوم شمس القدس ركنت للغياب و شب غبار الفاجعه و الكون عج

ارتجت اعله المرتضه السبعه الشداد و لبست الكعبه اله اثياب السواد

يثرب و مكه و منه وقفن حداد و بالمصايب ماي زمزم صار مج

ارتفع صوت النايحه و صار العويل بين نوح و بين آدم و الخليل

و بين موسه و عيسه و أيوب العليل كل نبي و مرسل قطع بالحزن فج

انخسف وجه القمر للمرتضه اليوم و الشمس نشرت دوايبها و تحوم

فاض دمع الحزن بعيون النجوم و الكواكب زجها دمع الهضم زج

اليوم هالناس اغدرت أول إمام و من عقب حيدر عله الأمه السلام

عقب ذاك النور عاشت بالظلام و بالمصيبه اشجم قلب هاليوم وج

حايره الوادم و ما تدري اشتقول غاب عنها اليوم ابن عم الرسول

هذا مصدر علم للرايد ينول هذا كعبه و بيها قلب الكون حج

اتيتمن هاليوم سيفه و رايته و سال دم طبرة مواضع سجدته

العالم العلوي انفجع لمصيبته و هجت أرباب العلم بالنوح هج