تنذبح ظامي ... خابت أحلامي

و آنه جانت ظنتي ... انت تحضر دفنتي ... (آه آه آه يبني)

يا عطر زهرة حياتي و يا نسيم اللي يمر ... يبني يالأكبر

يعيني ظل يمرح خيالك يامن تركت الجمر ... بالگلب يسعر

يالمتت ظامي و عفتني ضايعة بگاع الصبر ... بيمن أتصبر

حسبت لو خلص عمري انت تحفر لي الگبر ... و للدفن تحضر

يا وسف تالي ... ضاعت آمالي

جنت أظن يا منيتي ... انت تحضر دفنتي ... (آه آه آه يبني)

جيتك المصرعك يبني لن اشوفك منذبح ... و اقعدت يمك

تخيلت جدك محمد عالترب دمه يسح ... من شفت دمك

حرت ياطبرة اشدها و راح اضمد ياجرح ... حايرة بجسمك

شما اضمد جرح منك جرح ثاني ينفتح ... يا بعد أمك

تنزف جروحك ... غيبوا روحك

حسبت يا ضنوتي ... انت تحضر دفنتي ... (آه آه آه يبني)

غسلت يا وليدي جسمك من دمع عيني اللي يصب ... يا بعد عمري

وگطعت گلبي بيديًّ و يمك انثرت الگلب ... و الدمع يجري

ريت لا ينحفر گبرك ريت يبني بهلترب ... ينحفر گبري

انت بالمصرع يالأكبر و آنه بديار الغرب ... حايرة بأمري

بلوعة امصابي ... جمرة اصوابي

جنت اريد بموتتي ... انت تحضر دفنتي ... (آه آه آه يبني)

يبني كل حسبة احسبتها طلعت بعكس الجمع ... و اختلف حالي

گلت افرح تالي عمري لني بس اجر الدمع ... يبني يا لغالي

گلت من تكبر تسرني لن اشوفك منصرع ... و طايح گبالي

قلت انت الوالي عندي تالي صرت بهلوضع ... انه ماالي والي

جانت اظنوني ... من يدفنوني

انت تحفر حفرتي ... انت تحضر دفنتي ... (آه آه آه يبني)

يبني يا أشبه الوادم بالنبي سيد البشر ... وجهك اليسطع

بينك و بين ابو اليمة حيرة حيرني الدهر ... و كلمن بمصرع

مرة يم حسين اروحن و امسح دموم النحر ... جسمه الموزع

مرة يم جسمك يالأكبر ارجع بنوح و قهر ... و اسفح المدمع

و يرجع احسابي ... لساعة غيابي

من اودع دنيتي ... انت تحضر دفنتي ... (آه آه آه يبني)

ماجنت ادري يعذب هاكثر فقد الإبن ... دمعتي تخبرك

لمن فگدتك عرفته و عرفت معنه الحزن ... و فگدت بدرك

توذر على الگاع جسمك بين طبرات و طعن ... و انگطع نحرك

ريت ذباحك ذبحني و ريت وياك اندفن ... و اسكن بگبرك

ضاعت اسنيني ... و انت تدريني

هذي يبني غايتي ... انت تحضر دفنتي ... (آه آه آه يبني)