يا نايبه اعلينه جرت ... ما تدري بيها

تصبر يغايب هاكثر ... ملت الناس من الصبر ...ما تدري بيها

تضل غايب تضل صابر تنطوي اعليك الليالي

كَول يا هي اللي تهون اعليك يا تاج المعالي

الشماته من المعادي لو اعتاب من الموالي

اتشوف الموالي من الصبر ... ايلوم او يعاتب يالضخر

و اتشوف الارجاس الكفر ... تدعي اوجودك خيالي

يا فرقة تكَدر سيدي ... تسمع حجيها

يا محنة من هاي المحن ... يا فتنة من هاي الفتن ...ما تدري بيها

لون تنظر مجتمعنه ابنظر لطفك و العنايه

جَا توضحّلك الواقع و لو عندك بي درايه

للمشاكل هدف صرنه إتعلموا بينه الرمايه

يا هو البعد بي نتصل ... غيرك يبن سيد الرسل

سيدي إو من يكَدر يحل ... هالمشاكل و القضايه

الغيرك مشاكلنه بعد ... ما نشتجيها

لي نشجي عدها إمن الضرر ... هيّه التجيب إلنه الخطر ...ما تدري بيها

او بعد يالمحجوب نذكر الك من بعض الوقايع

الدين هذا البيه كل العالم اينول المنافع

اجتماعي اقتصادي اكتشافي نهج واسع

اصبح يبن سيد البشر ... تتلاعب اعليه الفكر

يا هو اليجي يبدي نظر ...عكس ما هو ّ الواقع

وادم تجعله مرتبه ... العيشه عليها

و اهل الضلاله الكافره ... اتجعله سخافه إومسخره ...ما تدري بيها

هذا منهاج الديانه و الشريعة الاحمديه

ايقدم ايهذب ينوّر ينطي أحسن معنويه

تنبثق منه العلوم الجوهريه الواقعيه

هذا العلم هذا العمل ...تقتبسه اجناب الملل

والامّه تبكّه اعلى الجهل ... و الاوهام الدنيويه

ما تدري شنهي المنفعه ... المحصليها

تصبح او تمسي اعلى العظم ... واحد ويه الواحد خصم ...ما تدري بيها

هذا يالغايب الحال البيه اصبح مجتمعنه

لا تقدمنه النهجنه او لا استحصلنه نفعنه

لا لزمنه الاكتشاف او لا تمسكنه ايشرعنه

الغير بعلمنه استنفعت ... و تعلمت و تقدمت

و على الفضاء اتسيطرت ... و احنه ضلينه إبوضعنه

اصبحنه بس التفرقه ... متعلميها

نِدرس شغب نبحث فتن ... هم هذي يا شبل الحسن ...ما تدري بيها

هاي كلها اعلينه تجري و انته يالمحجوب عالم

هاي كلها و انته نيتك بعد تتنطر علايم

يا علامه او هاي شنهي البعد تجري اعلينه لازم

لو انته تكَدر هاكثر ... عل الغيبه تتحمل صبر

اصبر لجن ما يبن الطهر ... اعليك شيصبر الوادم

يا سيدي الوادم تره ... فكَدت وعيها

مثل السفينه البلبحر ... كلسا يهددها الخطر ...ما تدري بيها