خلهم يلومونه .... لتظن يهمونه

نلتزم بالعباس .... متهمنه كل الناس....خلهم يلومونه

خلني يالعندك ملامه خلني برياض السعاده

الليله مولد قمر هاشم و القلب ذاب ابوداده

عاشق و هايم بشوقي و غردت لحن الولاده

طير السعد رفرف علينه اجناحه

و أنغام شوقه امن القلب صداحه

زهرة قمر هاشم تظل نفاحه

هالنفحه عزتنه .... تنفح الأمتنه

و إتعطر الأنفاس.... متهمنه كل الناس....خلهم يلومونه

لو ردت تعرف كريم ايجود و بوصفك توصفه

جربه و طبع التجارب ينطي للإنسان عفه

و إحنه جربنه قمرنه الينطي ويه النور جفه

جربنه كلما بالتجارب مخفي

ما شفنه مثل القال أرخص جفي

و لو ردت أوصفه اوياه ناجح وصفي

تظهر لك أطباعه .... من مصدر الطاعه

و إنوده عن إحساس.... متهمنه كل الناس....خلهم يلومونه

مولد العباس حكمه ما مثلها اتصير حكمه

حفظ ويه حسين عهده و طاعته و حافظ الذمه

تأبه ذاته و تأبه نفسه ينولد قبل أبو اليمه

هذا بن بنت الرسول الزهره

و هذا بن أم البنين الحره

و إثنينهم بالوصف شمس و بدره

هذا البدر حلمه .... من شمس أبو اليمه

كلمن إله مقياس .... متهمنه كل الناس....خلهم يلومونه

إنتابع حسين و عضيده و خل يلومنه العواذل

و لو ينشدون نجاوب إحنه ما نقبل الباطل

حسين عزتنه و شرفنه و المجد من ابو فاضل

أمجاد من شمس و بدر نكسبها

و احروف اعله القلب نكتبها

معدوده أيام الدهر نحسبها

من تقضي دنيتنه .... الموعد ابجنتنه

رغماً عله الأرجاس.... متهمنه كل الناس....خلهم يلومونه

همت من فرحتي و جني الكربله إنتقلت أفكاري

بين صحن حسين و العباس تتنقل أنظاري

الشمس يسطع عن يميني و البدر جانب يساري

من فرحتي هلت دموع الأفراح

ناديت بإسمك يا قمر صوتي صاح

يا وسفه ماضينه جزه و فات وراح

التربة أيمتنه .... ننتظر رجعتنه

حاشه العدل ينداس .... متهمنه كل الناس....خلهم يلومونه