آنه يا ناس العقيله بت علي حامي الحميه اتورثت كل المصايب من أمي فاطم الزجيه

حزمت قلبي المصايب يا خلق بأول حياتي من افقدت جدي و حنانه هالدهر سجل وفاتي

آنه تاريخ النوايب يروي صفحة نايباتي و ابتدت رحلت عذابي من رحل سيد البريه

و من رحل سيد البريه بعده جم موته متتها و ذبني النوح الموت تالي أمي لمن فارقتها

ويلي من كسروا ضلعها آنه بعيوني شفتها ابموتت الزهره الوديعه داهمت روحي المنيه

داهمت روحي المنيه والدي لمن فقدته روحي ثالث ماتت و انطبر قلبي الطبرته

ما شفت فرحه ابحياتي ثوب أحزاني لبسته اتيتمت و الهم كساني من بعد هاي الرزيه

و من بعد هاي الرزيه عمري حفروا تالي لحده للحسن من شفته بالسم قطعوا يا ناس جبده

و هذي رابع مره أموتن و الأجل وافاني وعده برميته لا ما خطاني زينب آنه الهاشميه

زينب آنه الهاشميه ابكربله شفت المصايب ابحر من دم شفت اخوتي سابحه وسط الحرايب

و أبو اليمه حسين جسمه امقطع ابسيف الكتايب و هذي خامس مره أموتن ابموتت حسين و أخيه

ابموتت حسين و أخيه ضاع كلما جان عندي اليوم جني افقدت أمي ووالدي و الهادي جدي

و ارجعت للشام أسيره و الأعادي ابدمعي تحدي و كل أهل بيتي عفتها امذبحه بالغاضريه

امذبحه بالغاضريه كل إخوتي و كل بنيني و عشت لمصيبه الرهيبه ابلوعتي و نوحي و أنيني

و الأجل تالي لفاني و غمضت تاليها عيني و محد ابموتي حضرني امن اخوتي و أسبل ايديه