هاك الدمع يا عطشان و اشرب من دمع عيني

زينب آنه يبن أمي جيتك و الحزن وياي

أريد أحسب لك اهمومي و أشجي هضم دنياي

من عقبك بعد هيهات أتهنه بلذيذ الماي

عطشان انفطر جبدك ... تعفر بالترب خدك

و ماريد العمر بعدك

و خليني يبو السجاد يم جثتك خليني

و خليني أظل يمك أشد اجروحك التجري

ياريت العمر لا طال من بعدك شلي ابعمري

وين الخذر وين العز لا عزتي ولا خذري

راح الخذر يبن أمي ... و لا واحد حضر يمي

يزيل امصيبتي و همي

وين أتوجه اليا صوب ما تقعد تحاجيني

ما تقعد تباصرني وين أنطي الوجه لاوين

وحدي ابديرة الغربه و اتحيرت بين أثنين

أطفي اخيامك التسعر لو أجمع حرم يحسين

فكري امدوهن و محتار ... ما بين السلب و النار

هذا اللي جره و الصار

محتاره و أدير العين ما واحد يدليني

صوبني الدهر يا حسين و آنه احملت ست اسهام

أحزان و مرار و خوف لوعات و همه و آلام

من ساعة هجوم ما ظلت علينه اخيام

نار الخيم منشوبه ... و ظلت حرم مرعوبه

و العبرات مسجوبه

و سيل الدمع متواصل بين العايله و بيني

يابن أمي من أشوف القوم كل ساعه تشن غاره

و آنه العيلتك ظليت متلوعه و محتاره

و هذا امخيمك يا حسين تسعر بالقلب ناره

من عقب الأهل تالي ... ما ظل خذر لعيالي

ريتك تنظر الحالي

من جور الدهر مليت ريت الأجل يلفيني

جنه بالأمس يا حسين بين الأهل و الوليان

لن صرنه يا خويه اليوم بين الدهر و العدوان

و إقبالي أشوف اجسوم متوسده اعله التربان

و آنه الهضم شيبني ... و بديار الغرب ذبني

و سهم الحزن صوبني

و كل ساعه سهم جتال كَوس الدهر يرميني