زينب لفت يم حسين... لﭽن ﮔابعه بالهم

تﮔله يا ضوه عيوني... عليمن هالفزع ملتم

تعنت ليه للخيمه ... وتفسر الصخر ونتها

طبت قعدت اﮔباله ... وعالخد تهل دمعتها

تﮔله اعليك ضلع امك ... المظلومه او مصيبتها

سولف لي يماي العين...لا تخفي علي يحسين...عليمن هالفزع صوبين

وأشوف ابكثر عج الخيل ... وادي كربله غيم

أويلي من سمعها احسين... سالت دمعة اعيونه

يﮔلها أخاف أسولف لﭻ... او وجهﭻ ينخطف لونه

ابﭽتلى او ﭽتل أهل بيتي... يختي الﮔوم يردونه

ولا بد ما تشوفينه...فوﮔ الثره امﮔطعينه...يزينب لا تنوحينه

عينج عاليتامه النار... لو شبت بالمخيم

تﮔله الكاتبك يحسين... من هالناس ﭽا وينه

يﮔل لها يماي العين... كلها انﮔلبت اعلينه

تﮔل له حمل اضعونك ... او سدر للوطن بينه

يﮔل لها ما يخلوني...أسدر بعد بضعوني...نيتهم يﭽتلوني

ولابد ما تشوفيني ... او شيبي يﮔطر امن الدم

والأكبر عالأرض مطروح ... يختي عيونج اتشوفه

او جاسم عالثرى مرمي ... ابدال العرس والحوفه

وأخوج اعلى النهر نايم... ويمه امﮔطعه اﭽفوفه

او يمه رايته او جوده...او عينه ابسهم ممروده...بطل حيلي على ازنوده

لو شفتيهن ابكتره ... او جسمه اعلى الثره امخذم

يختي او سهم المثلث... ابدلالي تشوفينه

او عبدالله الطفل يختي... ابدم نحره امطوقينه

او لو شفتي الشمر يمي ... ابعدي او لا تحاﭽينه

تره هو يﮔطع ابنحري...او يتربع على صدري...يزينب عايني او صبري

لمن يحكم الباري ... او هوه ابحالنا أرحم