مهدك يا عبدالله ابروحي .... يالنايم ما بين اجروحي

روح أمك يوليدي اتلوب....يا النايم ما بين اجروحي

عبدالله يا نجمة سحر كل سا تغيب و تبدي

لو أدري ضامي تنذبح جان اعصرت لك جبدي

خليت جفني ابفرقتك يترس دمع و يبّدي

يوليدي ما ظل كل أمل بس الصبر ظل عندي

يبني اطيوفك عشت اوياها .... أنسه الروح و ما أنساها

أصبر لفراقك جم دوب....يا النايم ما بين اجروحي

والدك من عندي خذك و آنه الشفت جدامي

يطلب الماي امن العده و ايصيح طفلي ضامي

لحظات لن شفت السهم صابك و نحرك دامي

ناديت يبني شنتظر من دنيتي و ايامي

ظليت أصرخ و أجري المدمع .... كل شي ايمر عالبال أتوقع

بس افراقك ما محسوب....يا النايم ما بين اجروحي

عبدالله جم نبله الدهر بمصيبتك راواني

ما ادري شنهو اللي حصل بين الزمان و بيني

سهرانه عيني ويه النجم ما لحظه نامت عيني

اشما تغفه عيني امن التعب آلامك اتصحيني

و بسهم الصابك ما أدري متصوب نحرك لو نحري

مو نحرك نحري المصيوب....يا النايم ما بين اجروحي

حرقتني نار امصيبتك و الدهر غير حالي

شيقول قلب الوالده التفقد ولدها الغالي

سهم القطع نحرك قطع نحري و فجع دلالي

عالمهد محنيه اوقفت و المهد منك خالي

مهمومه و أصرخ آه يبني .... عذبني امصابك عذبني

عطشان اتموت اشمطلوب....يا النايم ما بين اجروحي

عبدالله يبني من شفت نحرك ذبيح امخضب

ظليت النار ابمهج تلهب و تطفه و تلهب

محتاره أبقه اعله الصبر لو أ جري دمعي و أنحب

و السهم لمن صوبك قبلك دليلي اتصوب

اشلون أقدر أصبر يوليدي .... و إنته الرايح من بين ايدي

خليت الدلال ايذوب....يا النايم ما بين اجروحي

يوليدي محتار الفكر كل سا يمر ابحسبه

و اتحملت من كربله جم نايبه و جم نكبه

ما تطفه نار امصيبتك وسط القلب ملتهبه

آه يبني و آنه اتحيرت بين الدهر و الغربه

لفراقك زادت حسباتي .... عقبك ما تنشف دمعاتي

و المدمع لجلك مسجوب....يا النايم ما بين اجروحي