امصابك يا عبدالله و يومه ذكرني ابمحسن و اهمومه

آنه الزهره و جيتك بالهم أتعثر و الضلع امهشم

شفتك غارق و ابفيض الدم اتذكرت المحسن و ارسومه

ذاك المسمار الصوبني سهمي اتحول بالطف يبني

بالمحسن صار ايذكرني هيجت آهاتي المكتومه

لاجن ما ميزت ارسومك قد ما متغسل بدمومك

ذبحوك و فجعوني ابيومك قلبي و من ينحب لا تلومه

سهم اللي حز نحرك شفته و مسمار الباب اتذكرته

موقف عدواني اتمثلته آنه أم احسين المظلومه

عطشان و ما رووا جبدك وياهم يا ذنب العندك

روحي اهنا اينطرك جدك عالكوثر معروفه اعلومه

محسن ينتظرك بالجنه روح اهناك اوياه اتهنه

بيده الماي و يمه اتحنه صفي ادماك ابنار الحومه

كل ذيج الأحداث أتصور احسين اللي ذكرني ابحيدر

بالوادم هالمثله استنصر لا ناصر أبداً من قومه