تغيب روحي وتسرح بعالم خيالي

وانشد من المهد وينه.... راح عبدالله من إدينه...آه يبني

چني بأم الطفل تصرخ يا إلهي بجفن دامي

الماي ما يحصل بدينه ونشفت ثدي المرامي

لا لبن لا ماي عندي وإبني ظامي وگلبي ظامي

وتكبر بإبني الطفل..... وتنادي والمدمع يهل

عطشان إبني ينچتل..... وحرمله منحل عظامي

آه يبني....آه يبني والگلب حاسب حسابك

چنت أتأمل اشوفك شاب متهني بشبابك

والگدر حتم عليّ... تنذبح بالغاضريه...آه يبني

وبالطفل گصدت الزينب تنحب وتسچب العبره

هاكم إستلموا طفلكم نجذب على الماي حسره

تسلمت منها الرضيع وظلت محيره بأمره

بالطفل حارت عمته .....وعلى المخيم فرته

ما لگت ماي وچبدته ..... صارت من العطش جمره

آه يبني .... آه يبني وياك حيرني زماني

مثل سهمك حرمله بسهمه رماني

والسهم نابت بنحرك...... والدمه يفيض على صدرك...آه يبني

حسين من شاهد وديعة فاطمه وطفله ذهلها

گام إجلال لكرامة زينب وقدس فضلها

وأخذ منها الطفل لاچن ما تنشدوني شيگلها

كفي يزينب دمعتج ... والطفل ذوب مهجتچ

وجمرة چبدته بچبدتچ .... دهري ودهرچ شعلها

آه يبني... آه يبني وذاب گلبي من لهيبه

مثل گلبك صوبت گلبي المصيبه

جف دمع عيني وحليبي... وإنگطع منك نصيبي...آه يبني

وبالرضيع إرجعت زينب عالرباب وعلى سكينه

وللگمر هاشم نحرها ورايته ترف بيمينه

صاح زينب هاي زينب طلعتچ تصعب علينه

من الخدر يمخدره .... شبيچ وطلعتي محيره

صاحت چبدتي إمرمره ..... والطفل دخنت عينه

آه يبني..... آه يبني وحرمله نحل عظامي

نشفت ثدي المصيبه وفجرت دمع المرامي

والسهم صوب دليلي ... وصرختك هدمت حيلي...آه يبني

وموقف حسين ويا زينب والرضيع وگمر هاشم

غير الكون ونظامه وروع گلوب الفواطم

حسين صاح الطفل خله يموت بس عباس سالم

هاك إخذ طفلك نادته ....للگوم واعرض حالته

بلچن تروي چبدته ...... لو يموت بسهم ظالم

آه يبني..... آه يبني القلم سجل لك شهاده

والحبر من دم وريدك هاي للباري إراده

يولدي وتغيب عني ... بكربلا وينگطع ظني...آه يبني

شال طفله حسين بيده وبالگلب ماضي صوابه

وطلب شربة ماي من الگوم ما واحد أجابه

بس ابن شاهي تصده وبالنحر عين صوابه

والطفل من حس بالسهم..... وبوجه ابوه صد وابتسم

مذبوح رد بيه للخيم ...... وزلزل العالم مصابه

آه يبني .... آه يبني والگلب ماينام ليله

شحال گلب المنفجد منه خليله

والفراگ يعز عليّ.... يولدي شيطح بديّه...آه يبني