سهم لو بسمار صاب ابن الطهر ضلع كسروا بالحوافر لو صدر

جاوبوني الأصل بسمار وضلع والسهم والصدر صار إلهن فرع

من هجوم الدار شجع هالجمع على حسين التنجمع شرك وكفر

هاي باب بنار تسعر لو خيم حمل هذا السگط لو طفل إنفطم

هذا طفل حسين مذبوح بسهم لو محسن سگط من كثر العصر

جاوبوني ودم حمر تسچب العين فرع هذا الأصل من ظلم الثنين

ذبح طفل حسين من سگط الجنين والحسين إنغدر من ذاك الغدر

هاي زينب طالعه وتنخه الحسين لو الزهره الطالعه بيوم الثنين

هذا گنفذ لو زجر بيده اليمين السوط ولزينب تولاها بزجر

هذا المچتف علي زين العباد لو علي حامي الحمه لمن إنگاد

جاوبوني هالفرع عالأصل زاد مصايب الجرعت حتى الصبر

هاي زينب شابچه العشره وتصيح على التل وگفت تندب ياذبيح

لو الزهره تصيح من قلب جريح خلو بن عمي بمدامعها الحمر

وگف بالميدان ياخذ راحته لن إجاه الحجر صكه بجبهته

مسح دمه وسهم صابه بچبدته والجسم مشحون طعنات وطبر

رجع للتوديع سابح بالدمه وگف متحير ابّاب مخيمه

صاح يازينب يابضعة فاطمه ليه طلعت والگلب يسعر جمر

صاح يازينب اجمعيلي لعيال ارد اودعهم وودع هالأطفال

ليه طلعن نادبات بأشد حال حيث لن صابه الكسر ما ينجبر