كل خوفي مني تروح وتگطع حشاي

دهري ذبني عبدالله ياشمعة ضوه عيوني

هاك إخذ ماي العين ....... يابني وسلوتي

خل أفرح بدنياي....... وإنت فرحتي

خل أبتسم وارتاح ....... واشتم وردتي

ردتك ليوم الشيب........ وتلم كبرتي

دهري ذبني عبدالله يا شمعة ضوه عيوني

بالگلب صار رباك....... يامدلل أمك

گلبي المهد وحشاي.......بيه چنت أضمك

كل غالي ماغليك....... وحملت همك

من بعد تعبي شلون...... للموت اسلمك

صدگ يا بعد الروح ..... ما نمت ليلي

ولو يمر بيك الريح ..... يحزن دليلي

ومن تربي تربي وياك.... همتي وحيلي

يا شمعة الإيمان.... يالتضويلي

گلبي الذي رباك.... شنيّمه الليل

ياوليدي خليه وياك... يتهادى ويميل

لو ردت مني تروح.... يتهدم الحيل

ودم نحرك المصيوب.... من عيني يسيل

مرت عليّ ساعات.... وتحملتها

چانت تمر چالطيف.... وموالفتها

بسوگ الدلال الروح .... لجلك بعتها

ياوليدي لأجل رباك.... روحي حرگتها

محتاره بين أثنين.... ودموعي تنصب

ومن گلبك المعطوب .... گلبي تعطب

ما اگدر لفرگاك... فرگاك اليصعب

فراگك يخلد نار..... بالگلب تلهب

گلبي انرمى بسهمين.... وتقاسمه الهم

سهمك وسهم حسين.... لاچنه أعظم

بالتضحيه للدين.... تعلم وأعلم

من عالم التكوين.... أمري وتحتم