واتشمتت بيه الناس..... وانكسر ظهري

واشلون أفقدك خويه..... واشلون أفقدك

من طاح القمر و اتقطعت الجفين

وسهم القدر صابه و سلب ضي العين

ابهالحال اعتناله للشريعه احسين

يصيح بصوت وينك يا عضيدي وين

مسني الهضم واتعنيت..... يا خويه يمك

متنثر اعله التربان..... و اشلون المك

هذ آنه عندك خويه..... هذا آنه عندك

يظن عباس هذا اللي قصد يمه

ذباحه و تعناله لسفك دمه

ناوي يريد يفصل راسه عن جسمه

ما يدري حضر عنده أبو اليمه

وعيون الحسين تشوف..... حالة عضيده

وايقله عمري ابلياك..... لتظن أريده

ما يسوه بعدك خويه .....ما يسوه بعدك

قعد يم جسم أخوه ويجذب الحسره

وضع الحسين راس القمر عد حجره

عباس انتفض ظنه يحز نحره

عينه امصوبه و ما يقدر اينظره

ناده لون جيت اتريد..... تقطع وريدي

خليني اودع المظلوم..... و اخبر عضيدي

ما أنسه عهدك خويه..... ما أنسى عهدك

لن ايجاوبه المظلوم بالمدمع

أخوك آنه اعتنيتك خويه للمصرع

جسمك ليش اشوفه اعله الثره امقطع

وليش امن احجي خويه اوياك ما تسمع

جاوبه العباس و قال..... تحجي واسمعك

أقسم قسم يا مظلوم..... خجلان أودعك

بالهادي جدك خويه..... بالهادي جدك

يبو فاضل يخويه و يا بدر دنياي

يرمحي وسيف عزمي وساعدي ولواي

من شفتك صريع ابكتر جاري الماي

ظهري انكسر واتشمتت بيه اعداي

بيمن أرد هذا الجيش..... لو حاوطوني

ما تدري بعدك هالقوم..... يستوحدوني

حاير وانشدك خويه..... حاير وانشدك

اشوف اصواب راسك مهجتي تنصاب

و اتذكر أبونه الطاح بالمحراب

و يا جرح الأشوفه ابجثتك وصواب

اذكر ضلع أمي المنهشم بالباب

فقدك جمع هذا اليوم..... كل المصايب

و اتمنه يحفر بالقاع..... جف النوايب

لحدي اويه لحدك خويه..... لحدي اويه لحدك

يمن فقدك جمر بحشاشتي يلهب

حن أم الفصيل اعليك احن و انحب

تنتظرك يخويه بالخيم زينب

و اطفال و حراير الك تترقب

عندك حراير و اطفال..... رادت تشوفك

ابروحك تعالج و اتلوب..... واشلون اعوفك

وياي أردك خويه..... وياي أردك