ويَّ الوصي حامي الجار نطلع نشيّع الزهره

والينه خل نتشارك الليله اوياه كل شيعي خل يرفع بلحزان إنداه

يم الحسن يا فاطمه واويلاه حته الوحي اويانه ايصيح قلبه اختنق بالعبره

خل نسأل من الوصي ابحسره و دمعه من حيدر انريد الجواب إنسمعه

و اليا سبب يدفن إبليل البضعه سر هذا يا داحي الباب منك نريد اتفسره

جن الصميده الشيعته ايجاوبها دفن البتول ابليل من مطلبها

و ما يحضر العاداها و الصوبها ما تنسه بنت المختار كسر الضلع و الصطره

عدنه وصيه انقله يا بن عمها بالقبر أم الحسن من اتضمها

بهداي وسط اللحد لا تلجمها هدمت حيلي الزهراء بالباب ذيج العصره

حيدر الليله الزينب ايجابرها يمسح دمعها الوالي و يصبرها

عن كربله عقد الوله يخبرها شتكَول و تشوف حسين متوسد إعله الغبره

مقطوع راس حسين إخوها اتشوفه مسبيه تمشي اعله الهزل واتعوفه

جافل ظعنها مقطعات اجفوفه صوب الشريعه العباس لا يمنته و لا يسره