مهجتي اعله الفرح هاليوم صارت

و صور عن مولد أم الحسن صارت

ابجمادي الثاني و العشرين صارت

ولادة فاطمه الزهره الزجيه

علوم الزهره منهلنه و لوراد

ابدجرها يحله تسبيحي ولوراد

حضرنه الحفلت المولد ولوراد

نقدمها الرسول الله هديه

شمس للعصمه و اتحفها سماها

سمت و الخالق ابفضله سماها

إسمها فاطمه و ربها سماها

و فطمت شيعتها من نار السريه

اتروح الروح من جسمي وردها

الفرح هاليوم جاذبها وردها

الليله الدنيه فواحه وردها

تفوح ابمولد الزهره الزجيه

كرامة فاطمه الزهره لبتها

قصد جبريل يخدمها لبتها

تهاني الليله أقدمها لبتها

و أبارك زينب بأمها الزجيه

فاطم يا فضل يوصل فضلها

بحر بالعلم و التقوه فضلها

انكون ابساعة المحشر فضلها

نجاة إلنه من النار السريه

اليحبنه اعطور للخوه شملنه

خدمة فاطمه الزهره شملنه

ابفضلها ان شاء يلتم شملنه

و نحيي ابكربله حفل الزجيه

بحر الجود و الحكمه فضلها

و كل الوادم اتأمن فضلها

أم الحسن عالعالم فضلها

مثل فضل النبي سيد البريه

الليله اعله المحب نسّم هوالج

قلبي ما هوه الغيرج هوالج

كلما يملك الشيعي هوالج

شفيعتنه يا بنت سيد البريه

يزهره هله ابميلادج يزهره

و نورك من بده العالم يزهره

تغيبي عن سمه الدنيه يزهره

إنطفت أنوراج ابنور الزجيه

رضعنه امن الزغر حبها ولبناه

علو سبعه لدك ساسه ولبناه

البتول أُمنه و علي بانه ولبناه

حسن و حسين حب ما ظن تهيه

ابمولد فاطمه الباري حياها

و أفضل من حيه مريم حياها

ربح كلمن الها الحفله حياها

الشفاعه اينولها من الزجيه

و حق من شرف الكعبه وطاها

علي اللي طلق الدنيه و طاها

الليله انولدت الزهره وطاها

تمت فرحته ابهاي المسيه