يا لعايش عمرك بالحسره .... شاركنة بميلاد الزهر ه

وايّام الراحت خلّيها .... لا تشغل تفكيرك بيها

بين آفاق المحافل هاتف القدره ينادي

الليلة مولود الوديعة فاطمه بضعة الهادي

واليريد اليوم حاجه للدعه يرفع أيادي

ابفضل الوديعة فاطمه .... اتفتّحت أبواب السمه

ابنعمة الباري الدايمه .... انشمل كل محفل ونادي

يالمؤمن والباري يريدك .... تطلب منّه وترفع ايدك

كل دعوه الباري يلبّيها .... لا تشغل تفكيرك بيها

ادعو ربّم واحنه مثلك ندعو وانواصل دعانه

انصيح ياربّ الجلاله نهتف وتسمع ندانه

ياللي تقبل دعه المؤمن كََبل ما ينطق لسانه

ياربي بسمك نبتهل .... وابجاه بت سيد الرسل

للامه تجمع هالشمل .... وللشرع تحفظ كيانه

دعوتنه الخالق يسمعها .... وامتنه اعله الحكَ يجمعها

هالاُمّه الخالق يحميها .... لا تشغل تفكيرك بيها

ياإلهي ابجاه بنت المصطفه البيها احتفلنه

شافي مرضى المؤمنين وشافي ياربي عللنه

ولا تراوينه مكاره بالدهر ناتج فعلنه

وابجاه بنت المصطفه .... إنعم علينه بالشفه

ياربي واحنه بكل وفه .... نعمل ونوفي بعملنه

واشمازادت بينه العلّه .... عند الخالق هينه وسهله

علّتنه الباري ايشافيها .... لا تشغل تفكيرك بيها

اعليك نقسم ياإلهي ابولد الطاهره البضعه

ابلطفك اترجع الأسرى والشمل بيهم تجمعه

وكل أسير مفاركَ اهله للأهل سالم ترجعه

رحمتك يارب شامله وابجاه بنت سيد المله

كل غايب اترده لهله .... وصوت دعوتنه تسمعه

موعد رجعتهم ننتظره .... وتكمل بالمولود البشره

ربنه الأسرار ايراعيها .... لا تشغل تفكيرك بيها

الليله ميلاد الوديعه بضعة الهادي نبينه

وابفضلها ياإلهي بالرزق وسِّع علينه

ولا تخلينه نصير ابحاجة المارحم بينه

ارزقه يارب اللطف .... وانظرنه بعيون العطف

ولا تجعل ابقسوة ظرف .... لغيرك انقدّم ادينه

ربنه لهالوادم يرحمها .... وبيده الأرزاق ايقسّمها

يعلم بالحاله ويدريها .... لا تشغل تفكيرك بيها

ياإلهي بنور بنت المصطفه نوِّر دربنه

ارزقنه توفيق الإطاعه ابفضلك واغفر ذنبنه

واجعل احروف السلامه امطرِّزه ابصفحة كَلبنه

يامن تجلت قدرتك .... اغفر ذنبنه ابرحمتك

انته العزيز وعزّتك .... باللطف ترفع رتبنه

ميهم لو غيمت دنيانه .... واعيون الخالق ترعانه

رب الغيَّمها ايصحّيها .... لا تشغل تفكيرك بيها

ما تشوفك عين لاجن الك بالأرواح مشهد

بآخر الدعوات ندعو وانته لليدعوك مقصد

احشرنه يوم الحشر ويه عترة الهادي محمّد

منّك نريد وننتظر .... يوم القيامة ننحشر

ويه لحمل راية بدر .... وبيه دين الله تأيد

يحشرنه الخالق بالمحشر .... ويه الهادي وبنته وحيدر

وذنوبك ربك يمحيها .... لا تشغل تفكيرك بيها