من نوم القبور بسّك يا مختار

خيّي الحسن مات و حسين محتار

حاير و تجري دموعه علَى الخدود

ينظر عضيده برويحته يجود

بالسّم قلبه مفتّت و ممدود

يلطم على الهام و يدير الافكار

والله شعبني مجاذب ونينه

و حسين يمّه و يمسح جبينه

يقلّه يَمسموم قشره علينه

من بعدك تصير وحشه هالديار

قلّه يَمظلوم لاحظ هالعيال

لا تضيع بعدي خويه هالاطفال

بينا عدونا كل ما يحب نال

و انتوا انكسرتوا والله الجبّار

و انتَ الخليفه بعدي يا مظلوم

وسفه و ألف حيف نتفارق اليوم

سكّت من النوح سكنه و كلثوم

و امسح على روس الايتام الصغار

ودّعتك الله يا مهجة الروح

هذا وعدنا لا تكثر النّوح

بالسّم انا موت و تموت مذبوح

و اندفن يحسين و تظل بالاوعار

خلها تجيني زينب أراها

و قلها تخفّف عنّي بكاها

هجمت حزينه و حسرت رداها

قلها السبط ليش خويه بلا خمار

صبري على الضّيم يختي و الفراق

و مصيبة حسين تصدر بالعراق

غمضني يحسين منّي النفس ضاق

و مد إيده و مات و حسين محتار