(الفقرة الأولى)

حالته إشگد چايده وعلته هي زايده

يصعد أنفاس

جسمه نيران و جمر خوفي دمه ينفجر

غطوا الراس

يا خوتي نادوا الطبيب بلچت يداويه ويطيب

آه يا عباس

خل يجينا بالعجل أظن هو حان الأجل

عندي احساس

الضربة شگت هامته وصلت العين

والله صعبه حالته راسه نصين

الدين طاحت رايته وراح لمعين

حالته إشگد چايده وعلته هي زايده

يصعد أنفاس

ونطبر في طاعته ويتم الدين

واليتامى حاطته نوح وونين

يالشهيد بسجدته آه يابو حسين

بويه جاوب ليتام فتّح ليها عيونك

مد ايدك واحضنهم كلهم ينتظرونك

وامسح دمعٍ سجام من زهرات غصونك

وحشة وسودة الأيام يا بويه من دونك

جارت لذناب يا داحي الباب

خففوا عنه الكلام لا تزعجون الإمام

لا تكثرون النحيب يا خوتي تركوا الملام

والأبو مفارگ گريب والدعي نال المرام

والأجل حان وگرب ما يتم باگي الصيام

ماكو عيد ولا فرح حزن ونياح وظلام

أحقاد الگوم بانت هاليوم

نظروا حال الأملاك ودموعٍ إل تتحدر

خسف وكسف وأهوال شوفوا الكون تغير

وجبريل بعالي الصوت صاح الله وأكبر

مات اليوم الكرار سور الدين تكوّر

ياعين إلما تبچيه يا گلب إلما ينطر

نادى جبريل ونعى إنهدم ركن العلي

ما كو سيف إلا الفقار و لا فتى الا علي

والسراط المستقيم و هذا للأمة ولي

وانهدم ركن الهدى ياسماوات اهطلي

ياأرض بالخلق موجي ويا جبال اتزلزلي

غيرة الله اغضبي بالعذابات أنزلي

غابت لنوار بعد الكرار

يا شيعة راح واليكم طاح العمد خر السور

بعده الگوم تلفيكم بشروا بالهضم والجور

سراج اللي يضي ليكم ترى منه انطفى هالنور

وسيف اللي يداريكم عن العدوان ظل مكسور

والله ماهي عادته يبطي عنا بجيته

ويلزم الدار

هذي أنوار الصبح للعوالم تتضح

والوكت صار

مدري شصار وسدى والصلاة اتناشده

آه ياكرار

ننتظر صوت الأذان وكته يابو اليمه حان

يا حما الجار

ما إجا يصلي الفرض وشهي لعلوم

مدري هو عاگه مرض لو هو محموم

چيف ما فز ونهض لو خذه النوم

والله ماهي عادته يبطي عنا بجيته

ويلزم الدار

لو ترى صابه الدعي وسيفه مسموم

غاله بوكت السحر وسالت ادموم

والحقد بان وظهر كله هاليوم

رد بحسرة المحراب وافاده خر وذاب

ما يرجع داحي الباب حيدر ودعنا وغاب

شگو راسه نصين وتجندل ليث الغاب

هالضربه الميشومة ويلي وصلت لعصاب

ما يتعالج لصواب آه يا فجعة لمصاب

بعد الكرار وحان محتوم الگضى

والأمانه تسلمت عنكم الوالي مضى

لا طبيب ولا دوى ولا حبيب يمرضه

سافر وخلى الحزن وهذي عينه مغمضه

بعد الكرار وحشه هالدار

الكون أظلم هاليوم صاير في زلزاله

ومسجى شهر الصوم يبچي طاح إگباله

محرابك صب ادموم وعيونه هماله

وكل العالم مهموم مفجوع وينعى له

وكل لنجوم اختفت خرت بحسره وهوت

والدمع دم اهملت بالصوايح ولولت

ياوالينا من يسلينا

يابو اليمه ياحامي الجار عليك الدمعة محزونه

وگلب الشيعة جمر ونار لجل فرگاك مغبونه

وأملاك السما تنعى يا حيدر لا تصد عنا

تون بحالةٍ شنعه عزية وصيحة ورنه

وتهدم سور الإسلام وتشفّت بينا الأزلام

أعياد وفرحة وأعلام منصوبة ترفرف بالشام

مشمتة اليوم الظلاّم وعدها من أبرك ليام

2006/10/14