علي و الحسنين على نعشها

صاح ابو الحسنين و دموعه على خدّه تسيل ياحسن يحسين ودعوا امكم ترى حان الرّحيل

جذب وناته و تزفّر و انتحب خير العمل هالجنازه ودّعوها يا يتامى بالعجل

لا تكثرون البواجي جسم ابوكم منتحل طلعوا ايتام الوديعه بالبواجي و العويل

و زينب اتهل المدامع و القلب منها انفطر لازمه ام كلثوم و تنادي غدر بينا الدّهر

هاي يا بويه الوديعه شلون تدفنها بقبر للقبر خذني وياها و لا تخلّيني و تشيل

و المصيبه حين وقفوا اشبالها فو ق النّعش و مدّت إيديها على السّبطين و الكل اندهش

و ضمّت الأيتام ليها و ماج و اهتز العرش و اخذهم حيدر عن الزّهرا وعبراته تسيل

و من رفع ذيج اليتيمه عن صدر ذاك الشّهيد يوم مرّت فوق ناقه و شافته فوق الصعيد

راسه ابخطّي و جسمه امقطّعينه بالحديد خرّت تنادي يبويه شال ظعني بلا كفيل