ضحيت لك شباني....... من حبك وإيماني...يبني ويروح الهادي

اربع بدور و تزهر..... وانوارهم تتشعشع ...... من والدك هالزهره

يردون وحشة حيدر....والگلب بيهم يهجع ..... والصعب يسهل أمره

ولنصرتك يمشكر....... بثمار گلبي تبرع ........... وهديتهم للزهره

ردتك تردلي سالم..... وحظي بوجودك غانم

يا جوهرة وجداني..... ضحيتك شباني...يبني ويروح الزهره

آنه الذي سموني...... أم البنين الأربع....... وبالأربعه تفاديتك

والخلگ لو نشدوني..... يا فگد عندج افجع ......من دونهم خصيتك

شابحه عليك عيوني.... وگلبي عليك مگطع..... وعلى الأعز عزيتك

للاربعه أسلاهم ...... روحي واظن تنساهم

وذچرك بطرف لساني..... وضحيتلك شباني...يبني ويروح الزهره

چانت تشوفك عيني .... چني اشوف الهادي .... واتنور بمصباحه

يحسين شيسليني .... عگبك يريع أفادي .... يالگطعت سباحه

يحسين لا تخليني .... گلبي يحن وينادي .... مسلوبه منه الراحه

وجداني من وجدانك ... عنواني من عنوانك

يالشيدت صيواني .... ضحيتلك شباني...يبني ويروح الهادي

يحسين يوم المدت ... من المدينه ضعونك ... وللغاضريه النيه

ودمعتي بعيني لاجت .... وشفت الخطر بعيونك ... وضليت اصفج بيديه

حسيت روحي وگالت ... عطشان ويذبحونك .... وعيالك المسبيه

ونهدم عگبك حيلي .. وارعى النجوم بليلي

واتضرع الدياني ... ضحيتلك شباني...يبني ويروح الهادي

وعباس من وادعني .... حب إيدي وحبيته .... وگلبي عليه يتلاهب

ورفت الروح على إبني .. ولصدري من ضميته .. وادري بخوك معتب

وادري وليدي يسمعني ... وبنصرتك وصيته .. يحفظ كرامة زينب

وصيته يصخي بشوفه .... وبرگبته وبچفوفه

وادريه ما ينساني............. ضحيتلك شباني...يبني ويروح الهادي