يردون الماي من عندك ...يردون الماي

أطفال احسين و اعياله... يردون الماي

ليش يا عباس بس إلك تنخاك ... تدري هذا الجود من علي وياك

إنت متكفل ما تغض عيناك... الماي وين الماي صار بيد اعداك

إنت المعروف ابجودك... انت المعروف

و عندك معروفه الحاله ...يردون الماي

إنت يم احسين اتروح من يمه ... خاف لن رامي ايصوبه ابسهمه

تظل هالضجه تدوي بخيمه ... الجود هذا الجود إنت ملتزمه

اتظل ويَ احسين اتحرسه... اتظل ويَ احسين

لو ما ماي اتجيب لطفاله ...يردون الماي

الماي من صوبين بيه حرس ملزوم ... احسين كل جانب بيه تحيط القوم

احسين قل لك اعياله صاحت قوم ... انجان ما نشرب ماي نقضي اليوم

و ايخاف اعليك اعضيدك ...ويخاف اعليك

و أطفاله اتلوع اقباله ...يردون الماي

فكرت بحسين احسين فكر بيك ... اتخاف انت اعليه هوَ خاف اعليك

و لعيال اتريد ماي قصدت ليك ... و زينب اقبالك قامت اتحاجيك

و النهر ذاك اتقله ...و النهر ذاك

هاك الجود اتعنا له ...يردون الماي

هيَ بس زينب واقفه ابكترك ... إجت كل وحده ابحالها اتخبرك

هاي تحجي و ذيج ساكته اتنظرك ... و كلها ما عدها صبر من صبرك

عندك هالجود اتعرفك... عندك هالجود

و كل طفل يتربى له ...يردون الماي

التقدر اتحاجيك تحجي حالتها ... و الذي امأثر الضمه ابجلمتها

ابيمنتك قامت تحط يمنتها ... اتجيبها اتحطها فوق مهجتها

ما عدها إلسان تحجي لك ...ما عدها إلسان

تومي اعله المهجه ابداله ...يردون الماي

و هالأطفال انقول منهو علمها ... الجود عندك صار و اجت يا عمها

الحرم عافتها اتلوع بخيمها ... اشلون إجت اشلون العطش ألمها

حته الأطفال اتعرفك... حته الأطفال

كل طفل صرت ابباله ...يردون الماي

ذاك إجه ايدورج عينه لك تربي ... و هذا جه يصرخ عالرمل يحبي

و هذا يحجي ايقول العطش فت قلبي ... ايصيح من اضماي ما شفت دربي

كل طفل ايصيح دلالي ...كل طفل ايصيح

ايحط ايدك فوق دلاله ...يردون الماي