زينب إجت امن الشام .... ويه الحرم و الأيتام

گوم و شوف .... يا با الفضل**يا الموصوف .... يا با الفضل

يا باالفضل قوم اختك اتلقاها .... و العايله او كل الحرم وياها

و اتريد تشرح لك هضم ممشاها .... من يسروها امن الطفوف اعداها

شافت مصايب و آلام .... ويه الحرم و الأيتام

حته اليوم .... يا با الفضل **يا مظلوم .... يا با الفضل

نادت يخويه من طلعنه امن الطف .... ما نشف دمعي و حزني ما يتوصف

طول الدرب دمعي اليكت ما ينشف .... و بالسلسله زين العباد امجتف

ما أنصفوا هالظلام .... ويه الحرم و الأيتام

يا مصيوب.... يا با الفضل **يا مندوب .... يا با الفضل

أمشي يخويه و روسكم جدامي .... فوق الرماح و مظلمه أيامي

من يا كتر أحجي لك امن آلامي .... نحلت أرض الغاضريه إعظامي

خلاني دهري أنظام .... ويه الحرم و الأيتام

وين الماي .... يا با الفضل**يا رجواي .... يا با الفضل

هضم العليله ما يصير و لا صار .... من عقب عينك يا شبل حامي الجار

كفار حادي اظعونها و الأشرار .... و اتحملت وحدي الهضم و الأخطار

ما غمض جفني و لا نام.... ويه الحرم و الأيتام

غايب وين .... يا با الفضل ** وين احسين.... يا با الفضل

و أتذكر بأمي الزجيه الزهره .... و أذكر ضلعها و الصدر و العصره

و أذكر احسين الخيل داست صدره .... و كل إخوتي يا بالفضل عالغبره

أشبج العشره اعله الهام .... ويه الحرم و الأيتام

وحدي ابقيت.... يا با الفضل **و يمك جيت.... يا با الفضل

صابره و أصبر و الصبر عنواني.... ثابته و أثبت و الثبات إيماني

وشما زماني ابكربله اتولاني .... يبراني صبر المرتضه و يرعاني

حافظت للدين أحكام .... ويه الحرم و الأيتام

صبري اهواي.... يا با الفضل ** يا منواي.... يا با الفضل

طبتنه للكوفه يراعي النوماس .... زينب أنا و تتفرج اعلينه الناس

شفت النوايبو الهضم يا عباس.... بالصوت ضربونه الأعادي الأرجاس

و اتشاهد الخاص و عام .... ويه الحرم و الأيتام

راعي الجود .... يا با الفضل** بحر الزود.... يا با الفضل

امن الكوفه للشام الدرب تدري ابعيد .... و زين العباد امجتف الأيد بأيد

و الدمع يجري و قطع افجوج البيد .... و الشام أهلها امعيده و عدهم عيد

خالفت شرع الإسلام .... ويه الحرم و الأيتام

ابجتل احسين.... يا با الفضل ** فرحانين.... يا با الفضل

زينب أنا و جدي الرسول المختار .... و أمي الزجيه ووالدي حامي الجار

بالشام وحدي و أنتحب ليل إنهار .... محتاره أبقه لا معين و نغار

عفتوني بالطف يكرام .... ويه الحرم و الأيتام

كلها اتلوع .... يا با الفضل ** اتصب ادموع.... يا با الفضل

يا با الفضل شحجي لك امن امصابي .... و إلمن أوجه يبن أبويه إعتابي

منكم و لا واحد يرد إجوابي .... لخوتي و لا قومي ولا أصحابي

و الدهر صوبني اسهام .... ويه الحرم و الأيتام

جينه انزور .... يا با الفضل ** و كثره اقبور.... يا با الفضل