مر الظعن يا جمال بالغاضريه .... خوفي لحسين و عباس عدهم وصيه

قبل المدينه .... مر الظعينه.... بالغاضريه

اعيال النبي رد الهضم يحديهم .... و الحادي ناوي اليثرب ايوديهم

لمن وصل مفرق طرق حاديهم .... نادت الحره إخواني مر اعليهم

و اشلون تمشي ابكربله اتخليهم .... ايحسبون خوفي هالقلب ناسيهم

الجيتي ايحسبون أيام أرجع و أمرهم .... شنهو العذر و بيا روح من أمشي عنهم

لا تمشي بينه .... مر الظعينه.... بالغاضريه

أقبل الحادي و ناده يا لتنشدين .... هذي معالم كربله يخت احسين

الوجه العليل الحره دارت هالعين .... و صاحت يا عمه من ادفنت عودك وين

وصلته و نادت يا فخر كل ياسين .... جينه نودعكم يا خويه و ماشين

خاف من أروح اتقولون يمكن نستنه .... و اشلون اختنه ابهالحال ما ودعتنه

ابفضلك علينه.... مر الظعينه.... بالغاضريه

ما أحجي همي و حزني الماذيني .... مريت أسمعك خويه شتوصيني

و جن صوت ناده يا هله ابضي عيني .... اشلون القبر بينج يحول و بيني

عندي وصيه ورايد اتسمعيني .... يم قبر جدي و أمي اتذكريني

بعده القلب يلهب نار يا خويه ضامي .... أسمع بواجي الرضعان و آنه ابمنامي

صحت الولينه.... مر الظعينه.... بالغاضريه

يم قبر جدي حالتي احجيها .... و لمي مآسي سفرتج أرويها

و أم البنين الطاهره واسيها .... و الها سلامي و لهفتي بلغيها

و داري يا زينب ظلمه لا تخليها .... و لا يرد مهضوم اليمر اعليها

صاحت أنفذ شتقول لو بيها موتي .... أدري و قلت للجمال مرني اعله خوتي

وياك إجينه.... مر الظعينه.... بالغاضريه

نادت يا عمه قومي خذ بيميني .... القبر الكفلني يا علي وديني

وصلت و صاحت يا قمر تدريني .... جيت و على قبرك تقطر عيني

جيت و أمل عندي يا تعب اسنيني .... يا اما نسيتك و انت ما ناسيني

طول الدرب يا عباس أنحب و انادي .... لا تنسه خوتي ابممشاك مرهم يحادي

انلوح بيدينه.... مر الظعينه.... بالغاضريه

لن صوت أبو فاضل صدر من نحره .... خويه يا مهجة حيدره و الزهره

راعي حياتج بالحزن يالحره .... أسمع ونينج يرتفع بالحسره

لجن اشبيدي اعله الزمان و غدره .... طاحن يزينب يمنتي و اليسره

و اعيالي يم الأحزان أسمع بجيهم .... من صحتي يا حادي النوق مرني عليهم

و نادت اسكينه.... مر الظعينه.... بالغاضريه

و عندي وصيه و هالحجي اتسمعينه .... إبني يزينب انتي لتربينه

و اعله الكفاله و الوفه اتعلمينه .... و يطلب ابثار احجابج اتخلينه

و هو اليكفلج لمن اتخبرينه .... رايتي و سيفي و جودي اتسلمينه

أفرح لون لجلج يضحي ابعينه .... و العمته يفدي ابفخر جفينه

لو إبني حاديكم صار مريني يختي .... و ابجيتج يخت احسين تبرد جمرتي

و هم تآمرينه.... مر الظعينه.... بالغاضريه