عذبني درب الشام .... ما طبق جفني و نام

سهمك رماني .... آه يا زماني

يا زمن من عندك سبب كل بلواي .... من زغري و اتقابلت بالضيم اوياي

و اجفوني ذبلت من كثر دمع ابجاي .... و لمن وقع جافل اضعوني الوفاي

و عالنهر قلبي طاح .... و الأمل مني راح

و كل الأماني .... آه يا زماني

جمر الغضه ابوسط القلب حسراتي .... صبن دمه من الفرك راحاتي

فوق الوجن خلن أثر دمعاتي .... اقضيت الليالي أتقلب بحسباتي

بالطف عفت هالروح .... يمي لجساد اتنوح

و الهم ولاني .... آه يا زماني

من أمي كسروا ضلع من عندي اضلوع .... و شقد صبر عندك يقلبي المفجوع

فوق الرمح راس الحسين المقطوع .... و اعله الهزل مجتوفه لطفال اتلوع

أتفقد المضعون .... لو سكّت اليبجون

غدرك سباني .... آه يا زماني

شاب القلب من الهضم قبل الراس .... أتفقد الطفل اليطيح و ينداس

لو أستر العيله من اعيون الناس .... و من ضربوا امتوني صحت يا عباس

يا اللي جبتني اوياك .... هضموني خويه اعداك

ابشده تراني .... آه يا زماني

من قطعوا اجفوفك يراعي الغيره .... فوق الهزل من ديره رحت الديره

شحجي و أمري صعب تفسيره .... تنشدني عنك حين الطحت ابحيره

مني تريد اجواب .... و آنه ابدمع سجاب

مدري اشدهاني .... آه يا زماني

من عقب خدري و عزتي و ذيج الدار .... لني بخرابه قاعده و بين أشرار

الصوب المدينه اتوجهت بالأنظار .... يا جدي قوم انظر يطاها المختار

بس حرم و الأطفال .... يا الهادي و بيا حال

و محد رعاني .... آه يا زماني

اقضيت أربعين من الليالي يحسين .... ما بين لوعة قلبي و ادموع العين

و من شبلك أنشد خويه عن قبرك وين .... و عن قبر اخوك و رايته و الجفين

من اليسر رديت .... و القبرك اتعنيت

واشتد حناني .... آه يا زماني

جبت الودايع خويه يحسين و جيت .... قبرك حضتنته ابين ايديه وونيت

لرض المدينه اشلون أرد احتاريت .... أتوسد ابلحدك يخويه اتمنيت