رسالة حزن منهو اللي يوادي

للي كال قدمي لي يوادي

أنشدك و أنا محتاره يوادي

الطفوف اشكثر شفت منك أديّه

استعر بينه سعير الهم وصلنه

و بمثل أوصالك الطاحت وصلنه

يخويه من اليسر للطف وصلنه

و بس اكبوركم لاحت إليّه

علي خيل الحزن و الهم تعنت

بثجيل النايبه روحي تعنت

يخو زينب إلك زينب تعنت

كَوم استقبل الجانت سبيّه

مو مره ولاني الدهر مرات

و أيام اليسر يحسين مُرات

اعيالك برض الشام مرات

و للكوفه مشت وسفه سبيه

الدهر ما يوم دلالي يساره

لعند ايزيد ودونه يساره

وين القطعوا ايمينه و يساره

أخبره بالجره و الحل عليه

دليلي ابسيف جوهر الدهر ينشاف

المناظر بجت ما بعد ينشاف

زينب طولها الما جان ينشاف

يسيره اتروح لولاد الدعيه